Mesrûr Barzanî: Divê dawî li rewşa neyasayî ya li Şingalê were
Hewlêr (Rûdaw) – Serokwezîrê Herêma Kurdistanê Mesrûr Barzanî komkujiya Şingalê bi bîr anî got, “Em piştgiriya xwe ji bo daxwazên rewa yên xwişk û birayên me yên Êzidî dubare dikin û pêwîst e rewşa neyasayî ya li Şingalê bi dawî bibe.”
Serokwezîrê Herêma Kurdistanê Mesrûr Barzanî bi boneya salvegera komkujiya Kurdên Êzidiyan û êrişa li ser Şingalê peyamek belav kir.
“Pêşmerge destaneke dîrokî tomar kir”
Di peyama xwe de Mesrûr Barzanî got: “Beriya 9 salan terorîstên DAIŞê êrişeke hovane bire ser Şingalê û derdora wê. Bi hezaran kes kuştin û bû sedema windabûn û koçberbûna bi hezaran xelkê wê devêrê.
Em bi rêz û hurmet hemû qurbaniyên vê komkujiyê bibîr tînin. Herwiha em bi rêz xweragirî, qehremanî û qurbanîdana Hêzên Pêşmergeyên Kurdistanê bi serokatiya Serok Mesûd Barzanî bi bîr tînin, ku wan efsaneya terorîstên DAIŞê şikand û Şingal rizgar kir û destaneke dîrokî tomar kir.”
Mesrûr Barzanî herwiha destxweşî li hemû welatan kir ku wan tawanên DAIŞê yên li hemberî Kurdên Êzîdî bi awayê Komkujiye nas kiriye û got:
“Em hêvîdar in civaka navdewletî alîkariya me bike ji bo kêmkirina êş û azarên xwişk û birayên me yên Êzidî.”
“Rewşa Şingalê hîn jî asayî nebûya”
Serokwezîrê Herêma Kurdistanê tekez kir ku heta niha jî rewşa Şingalê asayî nebûye û got, “Ji ber xweferzkirina neyasayî ya milîs û grupên çekdar, xwîşk û birayên me yên Êzidî nekarîne vegerin cihê xwe û navçeya wan nehatiye avakirin.”
"Pêwîst e rewşa awarte ya li Şengalê bi dawî bibe"
Di beşeke din a peyama xwe de Mesrûr Barzanî anî ziman:
“Di vê bîranînê de, em piştgiriya xwe ji bo daxwazên rewa yên xwişk û birayên xwe yên Êzidî dubare dikin û pêwîst e rewşa awarte ya li Şingalê bi dawî bibe.
Ji bo bi alîkariya Hikûmeta Federal û civaka navdewletî ev navçe bê avedankirin û desthilata navçeyê jî vegere destê xelkê resen ê Şingalê, divê rêkeftina Şingalê were cîbicîkirin û hêzên neyasayî ji herêmê derkevin.
Em bejna xwe li ber şehîdên komkujiya Şingalê û tevahiya şehîdên Kurdistanê ditewînin.”