Hewlêr (Rûdaw) – Partiya Azadiya Kurdistanê (PAK) û Tevgera Demokratîk a Kurdistanê (TDK-TEVGER) di 9emîn salvegera êrişa Şingalê ya li hemberî Kurdên Êzidî de peyamek belav kir û wan tê de bangî Netewên Yekbûyî kir daku komkujiya Kurdên Êzidî bi fermi nas bike.
Îro nehemîn salvegera êrîşa DAIŞê ye ku Şingalê û derdora wêran kirin.
Roja 3ê Tebaxa 2014an, DAIŞê êrîşeke berfireh bire ser Şingalê û derdora wê û bi hezaran welatiyên sivîl ên Kurdên Êzidî kuştin û bi hezaran keç û jin û zarokên Êzidî jî dîl girtin.
Herwiha di wê êrîşê de bi sedan hezar xelkê sivîl ên Kurdên Êzidî mecbûr man cih û warê xwe biterikînin.
PAK û TDK-TEVGERê îro di nehemîn salvegera komkujiya Kurdên Êzidî de peyameke hevbeş belav kir û tê de ji Netewên Yekbûyî xwest ku komkujiya Kurdên Êzidî bi fermi nas bike.
"Birîneke kûr e û ya hemû Kurd û Kurdistanîyan e"
Di peyama xwe de PAK û TDK-TEVGER got:
"Birîna jenosîda Şingalê ya ku xwişk û birayên me yên Kurdên Êzidî tûşî bûne, birîneke kûr e û ya hemû Kurd û Kurdistanîyan e. Heta niha jî gelek keç û jinên Kurdên Êzidî di destê DAIŞa hov de ne û wendayî ne.
Heta niha jî piranîya gelê me yê ku mecbûr mane Şingalê terk bikin, nekarîne vegerin ser cih û warên xwe.”
PAK û TDK-TEVGERê bangî Parlamento û Hikûmeta Herêma Kurdistanê jî kir, “Parlamento û Hikûmeta Herêma Kuristanê divê ji bo pêçana birîna xwişk û birayên me yên Kurdên Êzidî bernameyeke taybetî deynin ber xwe û bi cih bînin.”
PAK û TDK-TEVGERê di heman demê de bang li Neteweyên Yekbûyî jî kir û got: “Em bang li Netewên Yekbûyî dikin da ku jenosîda Kurdên Êzidî bi fermî qebûl bikin.”
"Em xemxur û şirîkê hemû êş û birînên xwişk û birayên me yên Kurdên Êzidî ne”
PAK û TDK-TEVGERê di dawiya peyama xwe de ragihand:
“Di nehemîn salvegera jenosîda Şingalê ya ku xwişk û birayên me yên Kurdên Êzidî tûşî bûne de, em DAIŞê û hemû piştgirên wan careke din rûreş dikin.
Em di nehemîn salvegera jenosîda Şingalê de, hemû şehîdên vê jenosîdê bi giramî bi bîr tînin, em xemxur û şirîkê hemû êş û birînên xwişk û birayên me yên Kurdên Êzidî ne.”
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse