Hewlêr (Rûdaw) – Serok Mesûd Barzanî piştî 6 salan çû Bexdaya paytexta Îraqê.
Serok Barzanî li Balafirgeha Navneteweyî ya Bexdayê ji aliyê Wezîrê Karên Derve yê Îraqê Fuad Husên, Alîkarê Serokwezîrê Îraqê Mihemed Temîm, Wezîrê Parastinê Sabit Ebasî, Wezîrê Karûbarên Civakî Ehmed Esedî û gelek rayedarên din ve hat pêşwazîkirin.
Li gorî agahiyên ku ketine destê Tora Medyayî ya Rûdawê, Serok Barzanî dê bi Serokwezîrê Îraqê Mihemed Şiya Sûdanî û bi gelek lîder û aliyên siyasî re hevdîtinan bike.
Serok Barzanî dê van hevdîtinan bi armanca dîtina “çareseriyeke guncav” a ji bo pirsgirêkên Hewlêr û Bexdayê bike.
Li gorî agahiyên Rûdawê, mijarên wekî “mûçeyên karmendan, yasaya petrol û gazê, hilbijartin û Kerkûk”ê di dosyeya Serok Barzanî de ne.
Herwiha Serok Barzanî dê “dosyeya Şingalê” jî bi rayedarên Îraqê re gotûbêj bike.
“Serdan di wextekî hestyar de ye”
Çavkaniyeke ji Hevpeymaniya Dewleta Yasayê li ser serdanê ji Rûdawê re gotibû:
“Serdan di wextekî hestyar de ye. Gelek dosyeyên navxwe, herêmî û navneteweyî hene ku divê Îraq û Herêma Kurdistanê xwe ji bo wan amade bikin û xwe bi hêz bikin.”
Li gorî çavlaniyên ku ji Rûdawê re axivîne, Serok Barzanî dê bi Serokê Hevpeymaniya Dewleta Yasayê Nûrî Malîkî, Serokê Hevpeymaniya Nesrê Heyder Ebadî , Serokê Hevpeymaniya Fethê Hadî Amirî û gelek berpirsên din re bicive.
Serok Barzanî herî dawiyê 22yê Çiriya Paşîn a 2018an çûbû Bexdayê û li Balafirgeha Navneteweyî ya Bexdayê ji aliyê Mihemed Helbûsî, Hadî Amrî û gelek wezîr û rayedaran re hatibû pêşwazîkirin û bi gelek aliyên siyasî re gelek hevdîtin kiribûn.
Serok #Barzanî çû Bexdayê pic.twitter.com/YmxKu50LsL
— RudawKurdi (@RudawKurdi) July 3, 2024
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse