Hewlêr (Rûdaw) - Di merasîma sondxwarin û destpêkirina kar a Serokkomarê Tirkiyê de 21 serokên dewletan û 13 serokwezîr û gelek serokên parlamento, nûner û wezîrên welatan û berpirsên saziyên navdeletî beşdar dibin.
Serokkomarê Tirkiyê Recep Tayîp Erdogan ku bi dengên 27 milyon û 834 hezar û 589 welatiyên Tirkiyê bûye Serookkomarê Tirkiyê, îro roja Şemiyê 3ê Hezîrana 2023an piştî sonda yasayî bi awayek fermî bo cara sêyem dest bi kar dike.
Erdogan demjimêr 14:00an de destpêkê li Parlamentoya Tirkiyê sonda yasayî dixwe û mazbataya xwe ji serokê demkî yê Parlamentoya Tirkiyê Devlet Bahçelî werdigire. Piştre di demjimêr 15:00an de serdana gora Mistefa Kemal Ataturk dike û di demjimêr 17:00an de jî beşdarî merasîma destbikarbûnê ya li Koşka Serokkomariyê dibe.
21 serokên dewletan, 13 serokwezîr û wezîr û nûnerên 78 welatan beşdarî merasîma destbikarbûna Serokkomarê Tirkiyê dibin.
Serokê Herêma Kurdistanê Nêçîrvan Barzanî jî yek ji mêhvanên Serokkomarê Tirkiyê ye ku piştî encamên hilbijartinê ji aliyê Recep Tayîp Erdogan ve hatiye vexwendin.
Serokên dewletan ku beşdarî merasîma destpêkirina kar a Serokkomarê Tirkiyê dibin wiha ne:
1. Îlham Alîyev - Serokkomarê Azerbaycanê
2. Nicolas Maduro - Serokê Venezuellayê
3. Rumen Radev - Serokkomarê Bulgarîstanê
4. Ali Bongo Ondîmba - Serokê Gabonê
5. Umaro Sissoco Embalo - Serokkomarê Gîne Bissauyê
6. Cyril Ramaphosa - Serokkommarê Afrîkaya Başûr
7. Yakov Milatoviç-Serokkomarê Karadagê
8. Kasım Comert Tokayev - Serokkomarê Kazakîstanê
9. Sadir Caparov - Serokkomarê Komara Kirgiz
10. Denis Sassou N'Guesso - Serokkomarê Kongoyê
11. Vjosa Osmani-Serokkomarê Kosovayê
12. Ersin Tatar - Serokkomarê Qibrisa Bakur
13. Stevo Pendarovski - Serokkomarê Makedonyaya Bakur
14. Şevket Mirziyoyev - Serokkomarê Ozbekistanê
15. Paul Kagame - Serokkomarê Ruandayê
16. Macky Sall - Serokkomarê Senegalê
17. Hasan Şeyh Mahmud - Serokkomarê Somaliyê
18. Faure Essozimna Gnassingbe - Serokkomarê Togoyê
19. Serdar Berdimuhamedov - Serokê Turkmenîstanê
20. Muhammed Şahabuddin Çuppu - Serokkomarê Bangladeşê
21. Mamady Doumbouya - Serokê Gîneyê
Serokwezîrên ku beşadarî merasîmê dibin:
Şahbaz Şerîf - Serokwezîrê Pakistanê
Victor Orban - Serokwezîrê Hungaryayê
Nikol Paşinyan - Serokwezîrê Ermenîstanê
Abdulhamid Dibeybe - Serokwezîrê Lîbyayê
9 Serokwezîrên din
Sekreterê Giştî yê NATOyê Jens Stoltenberg û Sekreterê Giştî yê Sazmana Hevkariya Îslamê Huseyîn Îbrahîm Taha jî di nav de nûnerê 8 saziyên navdeletî jî di merasîma destpêkirina Serokkomariya Recep Tayîp Erdogan de beşdar dibin.
Serokê Dumaya Deweletê ya Federasyona Rûsyayê Vyaçeslav Viktoroviç Volodin, Cîgirê Serokê Komîteya Daîmî ya Kongereya Gel a Niştîmanî ya Komara Gel a Çînê jî di nav de 12 welat di asta serokên Parlamentoyê de li merasîma Serokkomarê Tirkiyê nûnertiyê dikin.
Serokkomarê Tirkiyê Recep Tayîp Erdogan piştî merasîmê sondaxwarinê û destpêkirina kar di demjimêr 19: 00an de li Koşka Çankayayê şîvekê dide mêhvanên xwe yên biyanî.
Tê pêşbînîkirin ku Erdogan piştî şîvê endamên Kabîneya nûya hikumeta xwe rabigihîne.
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse