Xelkê Efrînê ji erebkirin û tirkmenkirina herêma xwe ditirsin

Niha metirsiyek cidî li ser demografiyaya Efrînê heye û nişteciyên wê ji bierebkirin û bitirkumenkirina herêma xwe ditirsin.

Basên tejî koçber ji nava Xûteya Rojhilata Şamê, Homsê, Zebedanî, Dareya, Heleb û her devereke din ji Sûriyê derdikevin berê wan li Rojavayê Kurdistanê û bakurê Sûriyê ye. Rengê basan çi reng be berê wan li heman deverê ye, Bakurê Sûriyê, bi taybet jî ji Cerablusê heta Idlibê.

Di navbera Cerablusê li rojhilat û Idlibê de, herêma Efrînê ya Rojavayê Kurdistanê ketiye jêr fişara guhertina Demografîyê.

Ji deme ku Artêşa Tirkiyê û çekdarên opozisyona sûriyê yên ser bi Tirkiyê ve herêma Efrînê kontrol kirine, bi hezaran Ereb û Tirkmen li Herêma Efrînê hatine bicîkirin.

Çavkaniyeke taybet ji nav bajarê Efrînê ji Rûdawê re ragihand ku nêzî 130 hezar Ereb û Tirkmenên Xûteya Rojhilat, gundên Hemayê û Idlibê û Ezazê li bajarê Efrînê û gundên wê hatine bicîkirin.

Lê Serokê Encûmena Xwecihî ya Efrînê Dr. Ehmed Silêman ji Rûdawê re diyar kir ku ev hejmar hatiye mezinkirin û ne rast e.

Li gorî Silêman, derdora 20 heta 25 hezar biyanî li herêma Efrînê hatine bicîkirin û bi gotina wî piraniya wan malbatên çekdarên Artêşa Azad in.

Li gorî zanyariyên ku Rûdawê ji deverên cuda cuda yên herêma Efrînê bi dest xistin, malbatên Ereb û Tirkmen li her yek ji bajarê Efrînê, bajarokê Cindirêsê, gundên Mihemediyê, Basûfanê, Qitmê, Kaxurê, Qurnê, Meydan Ikbisê, Mosaka, hatine bicîkirin.

Li tevahiya gund û bajarokên ku çekdarên opozisyonê li wan bi cî bûne, malbatên xwe li wan gundan niştecî kirine.

Li gorî zanyariyan, rojane nêzîka 500 koçberên Xûte, Hema û Idlibê li herêma Efrînê tên bicîkirin.

Li hember jî, çavkaniyekê ji nav koçberên Nibilê ji Rûdawê re da zanîn ku çekdarên opozisyonê û bi serpereştiya artêşa Tirkiyê rê li pêş vegera koçberên Efrînê digirin.

Çavkaniyê diyar kir ku roja Yekşemê (29.03.2018) hezar û 200 otomobîl li ser rêbendê rawestiya bûn lê tenê 60 otomobîl derbas kirin.