Gever din bin berfê de ma

Hewlêr (Rûdaw) - Li navçeya Geverê ser bi parêzgeha Colemêrgê ya Bakurê Kurdistanê berfê jiyan rawestand. Herwiha li navenda Colemêrgê ji ber barîna berfê dibistanan navber dan perwerdeyê.

Berfa ku 3 rojan bê navber bariya, li navenda navçeya Geverê bilindahiya wê gehişte metreye û li deverên çiyayî jî 4 metre derbas kir. Li deverên çiyayî karûbarên vekirina rêyan berdewam in, tûnêlên ji berfê jî dîmenên balkêş derxistin holê.

Li Gevera Bakurê Kurdistanê Şemiya borî berfeke zêde bariya û heta roja Sêşembê berdewam kir. Ji ber berfa zêde rêyên 62 gund û 115 navçeyên niştecihbûnê hatin girtin.

Li Geverê bi taybetî deverên çiyayî bilindahiya berfê gehişte 4 metreyan û tûnêlên ji berfê jî dîmenên balkêş derxistin holê.

Tîmên vekirina rêyan li ser karê xwe berdewam in û aliyên peywendîdar jî dibêjin ku rêyên gelek gund û avahiyan hatine vekirin û ji bo vekirina rêyên gundên din jî kar û xebatên wan didomin.

Di heman demê de li navenda parêzgeha Colemêrgê jî ji ber barîna berfa zêde û bagerê tevahiya dibistanan îro Pêncşemê kirin behvedan.

Herwiha tê çaverêkirin ku dîsan barîna berfê destpê bike.

• Parve bike li ser
• Share on Facebook
• Share on Twitter
• Share on Whatsapp
• Share on Telegram
• Share on Viber
• Share on Messenger