Hewlêr (Rûdaw) – Tîma CPT ya Herêma Kurdistanê da zanîn ku di bombebarana îro ya li ser Mawet a Silêmaniyê de sivîlekî canê xwe ji dest daye û 5 sivîl jî birîndar bûne.
Îro danê nîvro çend welatiyên gundê Qamîşê yê girêdayî navçeya Şerbajêr a Silêmaniyê hatin bombebarankirin. Berpirsê Beşa Mafên Mirovan a Koma CPT ya Herêma Kurdistanê Kameran Osman ji Rûdawê re got, “Welatî 6 kes bûn, yek şehîd bûye û 5 kes jî birîndar in.”
Kameran Osman anî ziman, “Bi kesê mirî re birayekî wî yê bi navê Seîd jî hebûye. Ez bi Seîd re axivîm û hemû agahî ev in ku şeş kes bûne; 3-4 roj bûn li ser sînor nêçîrvanî dikirin û îro jî hatin bombebarankirin.”
Li ser nasnameya qurbaniyan jî Kameran Osman got ku wan lêkolîneke berfireh kirine û nasnameya qurbaniyan jî wiha ye, “Ezîz Mihemed Resûl canê xwe ji dest da. Seîd Mihemed Resûl, Mihemed Qadir Axa, Kwêxa Mihemed Elî, Zana Mihemed Elî û Salih Qadir birîndar in.”
Bombebaran li ser Çiyayê Kelaşînê yê gundê Zarûnê bûye. Li gorî Kameran Osman, wan piştrast kirine ku ew bombebaran ji aliyê firokeyeke bê firokevan a Tirkiyê ve hatiye kirin.
Li gorî CPTê ji Tebaxa 2015an û vir ve li herêma Şarbajêr ji ber bombebarana Tirkiyê 2 sivîlan canê xwe ji dest dane û 12 sivîl jî birîndar bûne.
Dîmenên birîndarekî bombebarana îro ya li ser navçeya Mawet a Silêmaniyê, dema ku ji bo nexweşxaneyeke Qeladizê dihate birin.
— RudawKurdi (@RudawKurdi) December 2, 2022
Zêdetir: https://t.co/UqR5UyHK5v pic.twitter.com/tIGqrhfinV
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse