Li Xarpetê pevçûn: 2 kuştî, birîndarek
Hewlêr (Rûdaw) - Li parêzgeha Xarpetê ya Bakurê Kurdistanê 2 grûp pev çûn, 2 kes hatin kuştin, kesek jî birîndar bû.
Li Taxa Dogukentê ya Xarpetê 2 grûp li ber kargehekê bi çekan pev çûn.
Di pevçûnê de kesek li cihê bûyerê hat kuştin û 2 kes jî bi giranî birîndar bûn.
Li ser agahdarkirinê tîmên tenduristiyê çûn cihê bûyerê.
Dema tîmên tendirustiyê gihîştin cihê bûyerê hîn pevçûn berdewam bû û birîndarek xist ambûlansê.
Herwiha gumanbarekî ku navê wî nehat zanîn di dema midaxaleya tîmên tenduristiyê de guleyeke din li birîndarekî da û wî jî li cihê bûyerê canê xwe ji dest da.
Tîmên tenduristiyê birîndarê din bir nexweşxanyê.
Hêzên ewlehiyê derbarê bûyerê de lêkolîn da destpêkirin û 3 gumanbar hatin desteserkirin.
Li Tirkiye û Bakurê Kurdistanê, êrişên bi çek û kêran zêde bûne.
Li gor rapora Weqfa Umutê, li Tirkiye û Bakurê Kurdistanê, di 7 mehên dawî de hezar û 938 êrişên çekdarî pêk hatine û hezar û 200 kes hatine kuştin.
Li gor amarên Wezareta Dadê ya Tirkiyeyê, sala 2022yan 69 hezar û 892 kes ji ber bikaranîna çek û kêran hatine darizandin.
Li gor amarên sala 2017an ên Saziya Serbixwe ya Lêkolînan Small Arms Survey, li Tirkiye û Bakurê Kurdistanê bi giştî 13 milyon û 249 hezar çek hene.
Ji wê hejmarê tenê 2,5 milyon çek biruxset in û 10 milyon û 749 hezar çek jî bêruxset in.