WAN – Li aliyekî berf e, li aliyekî bihar
Hewlêr (Rûdaw) – Li Wana Bakurê Kurdistanê di heman demê de du demsal hene.
Li aliyekî Wanê bihar e. Nêrgiz, sosin û beybûnan deşt û zozan xemilandine.
Lê li aliyê din bi metreyan berf heye û sir, serma û seqem e.
Kesên bi navê Salîh Kaplan got:
“Weke tê dîtin li aliyê rastê berfeke zêde heye lê li aliyê min ê çepê havîn hatiye.
Li deverên xwarê dema çêrandina heywanan dest pê kiriye.”
Li navçeya Şaxê ajeldar ajelên xwe li mêrg û zozanan diçerînin.
Lê li Miksa ku tenê 16 kîlometreyan jê dûr e ji ber dirêjbûna zivistanê ajel di axûran de ne û bi êm û kayê tên xwedîkirin.
“Niha meha pêncan e û em êm didin ajelan”
Ajeldar Turan Kaya wiha behsa hewaya sar a Miksê kir:
“Niha meha pêncan e û em êm didin ajelan. Berx nikarin derkevin.
Mih dê çend roj din derkevin lê berxik dê careke din di axuran de bimînin heta ku giya şîn bibe.
Hewa sar e û dema serma hebe keskahî jî şîn nabe.”
Li Miksê ji ber berfa zêde û hatina aşûtan beşeke rêyan jî hîn girtî ne.
Wan hem bi bihara xwe ya xweş û rengîn û hem jî bi zivistana xwe ya zehmet û dijwar li benda geştyaran e.