Wêne: Ji ber dîmenan, Rûdaw
Efrîn (Rûdaw) - Derfetên kar li bajarê Efrînê ya Rojavayê Kurdistanê kêm bûne, bi taybetî ji bo ciwanên ku vegeriyane malên xwe.
Henanê 23 salî hesinkar e, piştî ku li Heleb, Kobanî û Qamişloyê ma û sê meh in ve vegeriyaye mala xwe lê heta niha kar bi dest neketiye.
Henan Reşîdê hesinkar li ser rewşa dawî got:
“Em çûn Qamişloyê me firin çêdikirin, em hatin vê derê kar nîne, ne wekî berê ye û bi paş de diçe.
Kar nebe em dê li malê rûnin. Gerek çawa derfeta kar peyda bibe?
Mirov dikaneke xwe veke dikare kar bike wê kar hebe lê dikan nebe û mirov li cem xelkê kar bike nabe.”
Rewşa ewlehî û aboriyê li Efrînê bûye sedema bêkariyê û kesên ku vegeriyaye Efrînê kar peyda nakin.
Ferhad gulfiroş e, ji ber nexweşiya dêya xwe berî du salan ji Başûrê Kurdistanê vegeriya malê.
Bi gotina wî, niha xelkê Efrînê kêf û şahiyan nakin lewma gul nayên firotin.
“Dema ku çareya me nema em çi bikin”
Ferhad Menanê gulfiroş jî anî ziman:
“Efrîn jî Kurdistan e, em hewl didin li Efrînê bimînin û ji Efrînê dernekevin.
Dema ku çareya me nema em çi bikin, em berê xwe bidin cihekî jiyana me tê de hebe û rûmeta me tê de hebe.
Em xelkê Efrînê vê dixwazin, dema ku kar hebe helbet rûmeta mirov heye.”
Ji ber metirsiyên ewlehiyê, hejmara ciwanên ku vegeriyane Efrînê gelekî kêm e û piraniya kesên ku vegeriyane bi alîkariya koçberên li Ewropayê debara xwe dikin.
Amarên fermî yên derbarê hejmara bêkaran a li Efrînê nînin û encûmenên xwecihî yên girêdayî Îtilafa Sûriyeyê rê nedidan rêxistinên xwecihî û navneteweyî li ser belgekirin û tomarkirinê kar bikin.
Piraniya bêkaran 15-30 salî ne û rêjeyeke bilind a wan li gundan dijîn ku ji ber astengiyên rêbendên komên çekdar nikaribûn dakevin nava bajêr û bixebitin.
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse