Hewlêr (Rûdaw) - Kuştina Serokê Hemasê Îsmaîl Heniye, li Bakurê Kurdistanê jî di nava Kurdên muhafezekar de bû sedema nerazîbûnê.
Hinek niştecihên Amedê li hewşa Mizgefta Mezin kom bûn û nimêja xiyabî ji bo cenazeyê Serokê Hemasê Îsmaîl Heniye kir.
Xelkê piştî nimêjê li derveyî mizgeftê jî berdewamî da çalakiya xwe û li dijî Îsraîlê diruşm gotin.
Bi heman awayî li gelek bajarên din ên wekî Riha, Şirnex, Mêrdîn, Êlih û Çewligê jî ji bo kuştina Heniye protesto hatin lidarxistin û peyamên piştgiriya Filistînê hatin dan.
Serokê Sendîkaya Memur-Senê Ramazan Tekdemîr got:
“Îsmail Heniye dema xebera şehîdkirina 3 kur û 4 neviyên xwe wergirt, doza xwe radestî îradeyeke pola kir û êşa xwe veguhast sebrê û got, xwîna zarokên min ji xwîna xelkê Filîstînê ne hêjatir e.”
“Filîstin di berpirsiyariya hemû Misilmanan de ye”
Serokê Komeleya ONDERê Sadullah Arpa jî got:
“Mijara Filîstînê ne mijareke axê ya ji rêzê ye. Em di vir de xelet in. Ji ber ku Filîstin cihek û dozeke pîroz e.
Ji ber wê jî Filîstin di berpirsiyariya hemû Misilmanan de ye.”
Herwiha li Stenbolê jî meşeke mezin hat lidarxistin û li Enqerê qelebalixiya ku kom bû daxuyanî da.
“Ji bo welatê xwe biparêze xwe kir mertal”
Serokê Giştî yê Sendîkaya Memur Senê Alî Yalçin jî got:
“Jiyaneke bi rûmet û bi şeref jiya. Ji bo welatê xwe ji dagirkeriya siyonîst û keriyê kujeran biparêze, xwe kir mertal.
Îro miroveyetî di ezmûnekê re derbas dibe. Li hemberî kujerên siyonîst li her cihê cîhanê mirovên bi rûmet û şeref li kolanan e.”
Sendîkaya Memur Senê dê roja Şemiyê li 81 parêzgehên Tirkiye û Bakurê Kurdistanê piştî nimêjê mixrub çalakiyeke hemwext saz dike.
Serokê Hemasê Îsmaîl Heniye duh berê sibehê li Tehrana paytexta Îranê hat kuştin.
Supaya Pasdaran a Îranê ragihand ku Heniye li mala ku lê dima di êrişa Îsraîlê de hatiye kuştin.
.jpg&w=3840&q=75)