Kurdistan
endamê Konseya Rêveberiya Kobaniyê ya Rêveberiya Xweser a Rojavayê Kurdistanê “Erhan Arman” bi nasnavê “Berxwedan Mûş” ku Tirkiye îdia dike, di operasyonekê de jiyana xwe ji dest daye. Wêne: AA, Grafîk: Rûdaw
Hewlêr (Rûdaw) – Medyaya fermî ya Tirkiyê ragihand, endamê Konseya Rêveberiya Kobaniyê ya Rêveberiya Xweser a Rojavayê Kurdistanê “Erhan Arman” di operasyoneke taybet a saziya istixbarata wî welatî (MIT) de jiyana xwe ji dest daye.
Ajansa fermî ya Tirkiyê li gor agahiyên ku ji çavkaniyên ewlehiyê yên wî welatî wergirtiye, belav kiriye ku MÎTê li Rojavayê Kurdistanê operasyonek taybet pêk aniye û di wê operasyonê de endamê Konseya Rêveberiya Kobaniyê “Erhan Arman” ê bi nasnavê “Berxwedan Mûş” jiyana xwe ji dest daye.
Derbarê vê îdiaya Tirkiyê de hêj ti aliyên peywendîdar ên Rêveberiya Xweser a Rojavayê Kurdistanê daxuyanî nedane.
Ragihandina kuştina rayedarekî Rêveberiya Xweser ji aliyê Tirkiyê ve di demekê de ye, ku Hêzên Sûriyeya Demorkatîk (HSD) doh Yekşembê ragihand, ku li dijî torên sîxûrên Tirkiyê yên li navçeyên di bin kontrola Rêveberiya Xweser de operasyoneke berfirehbi navê “Operasyona Sond” li 9 bajaran daye destpêkirin.
Li gor daxuyaniya HSDê, operasyona wan li bajarên Qamişlo, Til Temir, Heseke, Şeddadê, Dêrazor, Reqa, Minbic, Til Temir û Kobaniyê destpê kiriye û heta niha 36 kes ku bi sîxûriya bo Tirkiyê hatine tohmetbarkirin, ji aliyê hêzên HSDê ve hatine girtin.
Li gor agahiyên ku ajansa fermî ya Tirkiyê belav kirine, Erhan Arman di sala 2013an de li parêzgeha Mûşê ya Bakurê Kurdistanê tevlî refên PKKê bûye û beşdarî gelek çalakiyên li dijî Tirkiyê bûye.
Herwiha hatiye ragihandin, ku Erhan Arman paşê derbasî Sûriyê û Rojavayê Kurdistanê bûye û li herêma Kobaniyê xebatên xwe meşandine.
Ajansa fermî ya Tirkiyê diyar kiriye, ku Erhan Arman sala 2019an di rêveberiya eyaleta Kobanî de hat wezîfedarkirin.
Li gor heman çavkaniyê, Arman li Kobaniyê di karê tunel û mewziyan de wek berpirsyar xebitiye û li dijî operasyonên Tirkiyê plan amade dikirin.
Tê nûkirin....
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse