Polîsên serbazî li Efrînê malên welatiyan talan dikin

Hewlêr (Rûdaw) - Polîsên serbazî yên hikûmeta demkî ya opozisyona Sûriyê li Diwara Newroz li naverasta bajarê Efrînê malên welatiyan talan dikin.

Çavkaniyeke taybet ji nav bajarê Efrînê ji Rûdawê re ragihand ku polîsên serbazî malên welatiyên Efrînê talan dikin.

Li gor çavkaniyê, rêbendeke polîsên serbazî bi fermandariya Ebû Îs li Diwara Newroz li naverasta Efrînê malên welatiyên Kurd talan dikin.

Li gor heman çavkaniyê, Ebû Îs û çekdarên xwe 1000 lîreyên sûrî wekî baca zorane li ser her dikanekî ferz dikin.

Herwiha dikan û malên xelkê ji xwe re didin bi kirê û her dikanekî bi 70000 lîreyên Sûrî didin bi kirê.

Çavkaniyê herwiha diyar kir ku Ebû Îs û çekdarên xwe otomobîlên welatiyên radigirin û bi hêceta desteserkirinê dibin cadeyekê û 5000 lîreyên Sûrî ji xwediyên otomobîlan distînin.

Herwiha, destê xwe danîne ser otomobîleke welatiyekî ku ji 4 salan ve li ba wî bûye û Ebû Îs û çekdarên xwe îda kirine ku otomobîla wan e.

• Parve bike li ser
• Share on Facebook
• Share on Twitter
• Share on Whatsapp
• Share on Telegram
• Share on Viber
• Share on Messenger