Mesrûr Barzanî Roja Karkeran pîroz kir
Hewlêr (Rûdaw) – Serokwezîrê Herêma Kurdistanê di 1ê Gulanê de got, “Em erk û rola karkerên Kurdistanê bilind dinirxînin.”
Serokwezîrê Herêma Kurdistanê bi peyamekê 1ê Gulanê Roja Karker û Kedkaran a Cîhanî pîroz kir.
Serokwezîrê Herêma Kurdistanê Mesrûr Barzanî roja karkerên Îraq, Herêma Kurdistanê û cîhanê pîroz kir û got:
“Em bi minasebeta roja karkeran a cîhanî, pîrozbahiyê li tevahiya karkerên Kurdistan, Îraq û cîhanê dikin.
Erk û rola berçav a karkerên Kurdistanê ya di warê avedankirin û bipêşxistina aboriya Kurdistanê de bilind dinirxînin.”
Mesrûr Barzanî di berdewamiya peyama xwe de bal kişand ser rewşa karkeran jî û wiha got:
“Em pabendiya Hikûmeta Herêma Kurdistanê ya ji bo baştirkirina jiyana karkeran û parastina mafên wan bi taybetî di warê tenduristî, silametiya pîşeyî û dabînkirina mafên wan ên bingehîn dubare dikin.
Roja karkeran a cîhanî pîroz be û bi hêviya jiyaneke hêja û baştir ji bo karkeran.”