Heyder Şeşo û Nalîn Hesen\ Wêne: Rûdaw
Hewlêr (Rûdaw)- Fermandarê Hêzên Parastina Êzidxanê Heyder Şeşo da zanîn ku bangawaziya Abdullah Ocalan di berjewendiya Kurdan de ye û divê hemû komên nêzîkî PKKyê guh bidin vê bangê.
Şeşo tekez kir ku bicihkirina vê bangê dê bibe sedem ku Peymana Şingalê were cîbicîkirin.
Şeşo beşdarî bultena Nûroj a Rûdaw TVyê bû û bersiv da pirsên pêşkeşkara Rûdawê Nalîn Hesenê û got,
"Peyama Ocalan di berjewendiya Kurdan deye. Pêwîst e Hikûmeta Tirkiyeyê nêzîkatiyeke rast nîşanî vê peyamê bide û Serokkomarê Tirkiyeyê Recep Tayyîp Erdogan bersiva vê bangê bide."
Şeşo got, "Divê Tirkiye li ser bingeha welatîbûnê nêzîkî Kurdan bibe û divê Abdullah Ocalan were berdan."
Fermandarê Hêzên Parastina Êzidxanê tekez kir ku bicihkirina bangawaziya Ocalan ne hêsan e û got, "Ji bo pêkanîna vê peyamê pêwîst e hemû aliyên Kurd wê qebûl bikin lê berpirsyariya sereke li ser Hikûmeta Tirkiyeyê û Erdogan e ku gavê biavêjin û hawîrdoreke baweriyê ava bikin."
"Divê komên nêzîkî PKKyê guh bidin peyama Ocalan"
Şeşo derbarê bandora vê peyamê ya li ser Şingalê axivî û got:
"Li Şingalê, divê komên nêzîkî PKKyê guh bidin vê bangê. Di heman demê de divê Hikûmeta Îraqê jî berpirsyariya xwe bi cih bîne û destûrê nede van koman ku çalakiyên çekdarî pêk bînin.
Pêkanîna vê peyamê dê hêsankariyê bike ku Peymana Şingalê were bicihkirin.
Ji ber ku hinek astengî û hebûna hinek komên nêzîkî PKKyê, pêvajoya asayîkirina rewşa Şingalê ji bo hikûmeta Îraqê zehmet dike. Bi taybetî jî di nav van koman de hinek welatiyên Îraqê hene."
"1500 PKKyî li Şingalê hene"
Fermandarê Hêzên Parastina Êzidxanê diyar kir ku li Şingalê nêzîkî 1500 PKKyî hene û got:
"Gelê Şingalê ji hebûna van şervanan nerazî ye. Peyama min ji wan re ew e ku berjewendiyên Şingalê li ber çavan bigirin û ji bo berjewendiyên kesane vê derê nekin qurban.
Ez hêvî dikim ku gelê me yê ku ji bo debara zarokên xwe neçar dibin bi van koman re tevbigerin, neyê qurbankirin."
"Divê HSD banga Ocalan pêk bîne"
Heyder Şeşo li ser pêşketinên li Rojavayê Kurdistanê jî got, "Divê HSD vê peyamê pêk bîne ji ber ku ev li berjewendiya gelê Kurd e li Rojavayê Kurdistanê.
Em bi ti awayî wekî merc danîn ku ew çekên xwe deynin. Divê dewleta Sûriyeyê li ser bingeha welatîbûnê nêzîkî Kurdan bibe û mafên wan nas bike."
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse