Hisên Omer û Sekreterê Giştî yê Weqfa Danielle Mitterrand Emmanuel Poilane /Wêne: Rûdaw
Sekreterê Giştî yê Weqfa Danielle Mitterrand Emmanuel Poilane got, "Danielle Mitterrand bi berdewamî hewl dida ku Kurd her tim di nav biratiyê de bin lewma jî wê hertim hewla lihevhatinê dida. Ev hêviya wê ya berdewam ku lihevhatin û biratî di nav Kurdan de hebe."
Emmanuel Poilane li ser naskirina Kurdan a li Fransayê wiha axivî, "Rastiya ku Kurdistan li Îraqê bûye herêmeke federal, rastiya ku Enstîtuya Kurdî ya Parîsê pir çalak e, rastiya ku Weqfa Danielle Mitterrrand her tim ji bo parastina pêwendî û danûstandinan berdewam e, van hemûyan hiştiye ku Kurdistan îro naskirî be."
Sekreterê Giştî yê Weqfa Danielle Mitterrand Emmanuel Poilane bersiva pirsên Berpirsê Deska Rojavayê Kurdistanê ya Rûdawê Hisên Omer da.
Rûdaw: Berêz Poilane, tu bi xêr hatî û spas ku tu bi me re yî.
Emmanuel Poilane: Spas ji bo we. Ez kêfxweş im.
Rûdaw: Pirsa min a yekem ew e ku hûn li vir in ji bo salvegera jidayikbûna Madam Danielle Mitterrand, çi tê bîra we derbarê rola wê di piştevaniya kurdan de?
Emmanuel Poilane: Du bîranînên sereke. Bîranîna yekem bi rastî ew şêweyê ku pê dilgiran dibû derbarê Kurdan de dema êrişên Sedam Hisên yên ser navçeya Helebceyê û navçeyên din. Û şêweyê hewlên wê ji bo desttêwerdanê û hatina bi hawara Kurdan ve û danasîna doza Kurd. Ev ji bo min bi rastî yekem babet e ku li bîra min maye.
Babeta duyem jî ku bi rastî ji bo min pir balkêş e, guhdana wê ya berdewam bû ku Kurd di nav hev de her tim bira bin û lewma jî hertim hewla lihevhatinê dida. Ev hêviya wê ya berdewam ku lihevhatin û biratî di nav kurdan de hebe, duyem bîranîna min e bi Danielle Mitterrand re dema ku em behsa Kurdistan û Kurdan dikin.
Rûdaw: Belê, hûn wekî Weqfa Danielle Mitterrand, hûn çawa mîrasa Madam Mîtterrand diparêzin di derbarê mafên gelê Kurd de bi taybetî?
Emmanuel Poilane: Şansê min hebû ku sê salan li gel Danielle Mitterrandê kar bikim ku derfeta min hebû li gel Serok Mesûd Barzanî çendîn car bicivim û li gel Serok Celal Talebanî cendîn car bicivim. Êdî min ev pêwendî parast, vêca di demekê de em rastî zehmetiyê hatin dema ku weqf hîn lawaz bû û Kurdistanê alîkariya me kir da ku em Weqfa Danielle Mitterrand biparêzin.
Ev di sala 2009an de bû, loma ji wê demê ve, me ji aliyekî ve bîranîna Madam Mitterand parast û pêwendî li gel Kurdistanê parastin. Gilbert Mitterrand çend caran hate Kurdistanê, bi taybetî ji bo bexşîna Xelata Danielle Mitterrandê ji bo jinên Pêşmerge û Kendal Nezan ku Serokê Enstîtuya Kurdî ya Parîsê ye, paşê me hin bernameyên geşepêdanê danîn bi taybetî ji bo koçberên di dema şerê li dijî DAIŞê de û me hin bernameyên pêgihandinê cîbicî kirin û me hin karên pêgihandina gencan encam dan da ku ew jî paşê zarokan pêgihînin.
Û heta roja îro jî projeyeke me berdewam e ku bi şêweyeke pratîkî ev nêzî 10 salan e em li serê kar dikin. Û niha em bi projeyeke nû difikirin. Projeyeke ji bo… projeyên ji bo çalakiyên keşûhewayê û bi taybetî jî ji nû ve çandina daran. Her tim jî bi pêwendî li gel komeleyên Kurd ku tên ba me û bi rastî ev xemxwariya me heye ji bo kar li gel Kurdan.
Rûdaw: Belê, niha piştî çend salan ji koçkirina madam Mitterrandê, em dikarin bibêjin ku li Fransayê nifşek heye ku doza Kurd dinase û piştevaniya wê dike?
Emmanuel Poilane: Ez … Ez bi rastî… rastiya ku Kurdistan bûye herêmeke federal li Îraqê, rastiya ku Enstîtuya Kurdî a Parîsê pir çalak e, rastiya ku Weqfa Danielle Mitterrrand her tim berdewam e ji bo parastina pêwendî û danûstandinan, van hemûyan hiştiye ku Kurdistan îro naskirî be li Fransayê û Kurd naskirî bin li Fransayê û Kurd heta li ser asta cîhanê naskirî bin.
Ev tiştekî pir girîng e bi taybetî jî di nav van salan de ku tevlîheviyeke navherêmî heye. Hin caran pêwendî di navbera Kurdan û Fransiyan de, di navbera serok Mesûd Barzanî û Hikûmeta Fransayê de pêwendiyên girîng in. Ji bo min rûmeteke mezin bû ku vê sibehê min dikarî silavê li Serok Barzanî bikim ku şansê min hebû bi Danielle Mitterrandê re wî nas bikim û hebûna wî hertim dihêle ku ev pêwendî berdewam bihêztir bibe di navbera me de.
Rûdaw: Belê, gelo em dikarin bibêjin ku niha pêwendî di navbera her du gelên Kurd û Fransî de pir bihêz in, yan jî pêwîstiya wan bi pêşxistina bêhtir heye?
Emmanuel Poilane: Pêwîstiya me her tim bi xurtkirina pêwendiyan heye. Lê rastiya ku sekreterê giştî yê Enstîtuya Kurdî di heman demê de mamosta ye li zanîngehên Fransayê ew jî dihêle bi şêweyekî ku pêwendî bihêz bibin. Pêwîstî her tim bi xurtkirina pêwendiyê heye, divê hertim pêwendî were xurtkirin. Lê bi herhal, di baweriya min de pêwendî li ser bingeheke baş e û em hertim rijd in ku beşdar bin li gel hemû aliyên ku dixwazin ev pêwendî bihêz bibe.
Rûdaw: Baş e, eger em bixwazin behsa pêwendiyên fermî yên di navbera Hikûmeta Kurdistana Îraqê û Hikûmeta Fransayê de bikin, hûn çawa van pêwendiyan dinirxînin?
Emmanuel Poilane: Min dît pir girîng e, wekî nimûne ku Balyozê Fransayê yê Bexdayê îro hatibû ji bo vê boneya sadsaliya jidayikbûna Danielle Mitterrand. Ev îşareteke bi rastî girîng e. Her wiha em behsa Konsul dikin ku serpereştyarê vê boneyê bû û her wiha jî balyozê Fransayê. Ji bo weqfê, pêwendiya ku em bi berdewamî li gel Kurdistanê ava dikin beşek e ji tiştên ku Wezareta Karên Derve û Wezareta Karên Navxwe gelekî derbarê wan de hestyar in.
Em wekî Weqf bi şêweyekî ji şêweyan wekî balyozekî ne ji bo Fransa li Kurdistanê. Loma Wezareta Karûbarên Derve û Wezareta Navxwe pir haydar in derbarê tişta ku em dikin de û ev jî îşareteke baş e. û paşê jî bi baweriya min em berdewam in di xurtkirina vê pêwendiyê de.
Piştî salekê ji wefata Danielle Mitterrand, Mesûd Barzanî hate Parlamentoya Fransayê ji bo beşdarbûna rêzgirtinê ya li Danielle Mitterrandê bi beşdariya hejmarek wezîr û di encamê de ev pêwendiya ku me dike yek ev pêwendiya qayim di navbera me wekî Weqf û Kurdistanê de bi şêweyekî her tim rolê dibîne da ku pêwendî xurt bibe di navbera Fransa û Herêma Kurd a federal a Îraqê de.
Rûdaw: Belê, li ser asta kultûrî, gelo hûn razî ne ji pêwendiyên kultûrî di navbera her du gelan de, di navbera Kurd û Fransiyan de?
Emmanuel Poilane: Ez dizanim ku enstîtu gelekî guh dide vê yekê. Şansê min hebû ku gelek caran Şivan Perwer bibînim. Wekî nimûne, ew beşdarî merasîma bixakspartina Danielle Mitterrandê bû û ew strana ku vê sibehê jî got ku di merasîma bixakspartinê de jî gotibû, ew jî nîşana vê pêwendiya bihêz e. Her wiha jî di derbarê mûzîk û helbestê de. Û bi her hal, belê, ji bo min, di derbarê kultûrê de, tişta ez dibînim pir xweş e di kultûra Kurdî de, ew e ku piraniya caran berfireh e, Kultûra li vir li Kurdistanê, kultûreke kurdî-Sûrî ye, Kurdî-Îranî ye û Kurdî-Îraqî ye.
Bêguman, êdî ji bo me wekî weqf, dema em behsa kultûra Kurdî dikin, pêwendiyek bi Kurdistana Mezin re heye ku ev kultûr tê avakirin ku li ser malpera me li ser înternêtê jî heye. Em ne tenê behsa Kurdistana Îraqê dikin, em behsa Kurdistanê bi giştî dikin û bi şêweyekî ji şêweyan kultûr vê rêyê dide me.
Rûdaw: Baş e, eger em behsa weqfê bikin, çi çalakiyên we li vir li Kurdistanê hene? Gelo hûn bîr li berfirehkirina van çalakiyan dikin?
Emmanuel Poilane: Niha du çalakiyên me yên sereke hene. Çalakiyek bernameyeke ji bo alîkariya zarokan û koçberan bi giştî li Kurdistanê. Her wiha bernameyeke duyem a hêvîdar heye di derbarê keşûhewayê û çandiniya daran de. Tişta din jî ku em behs dikin ku ev sê roj in em li vir in, dibe ku bîrokeya projeyekî bîranînê be bi şêweyekî ku pêwendiya di navbera Danielle Mitterrand, Mesûd Barzanî û Celal Talebanî de bikaribe bi berdewamî di nav kultûra Kurdî de cih bigire.
Di encamê de karekî bê kirin bi rêya nivîsan, fotoyan da ku ji bo gencên Kurd bîrokeya ku Danielle Mitterrand, dêya Kurdan, her tim rastiyek e. Ev yek dibe jî bi riya ku were vegotin çawa Danielle Mitterrand cihê xwe di pirtûkên dibistanên Kurdistana Îraqê de û herwiha di dîroka Kurdistanê de bigire, û ev jî kareke ku em dixwazin bipêş bixin û li gel we cîbicî bikin.
Rûdaw: Spas careke din berêz Poilane ku tu bi me re bûyî. Zor spas.
Emmanuel Poilane: Zor Spas… Spas ji bo we.
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse