Helebestvanê Kurd Hisên Hebeş di merasimekê de li Almanyayê ji aliyê Yekîtiya Giştî ya Nivîskar û Rojnamevanên Kurd li Sûriyê ve hat xelatkirin.
Hewlêr (Rûdaw) - Di merasimekê de li Almanyayê, Yekîtiya Giştî ya Nivîskar û Rojnamevanên Kurd li Sûriyê, helbestvanê Kurd Hisên Hebeş xelat kir.
Li bajarê Essen ê Almanyayê, îro di ahengekê de Yekîtiya Giştî ya Nivîskar û Rojnamevanên Kurd li Sûriyê Xelata Hamid Bedirxan pêşkêşî helbetvanê Kurd ê ji Efrînê Hisên Hebeş kir.
Hisên Hebeş helbestên xwe bi şêweyekî sereke bi zimanê Kurdî dinivîsîne, lê wî hin berhem bi zimanê Erebî jî nivîsandine.
Di 30ê Gulana 2022 de Hisên Hebeş ji aliyê ji Yekîtiya Nivîskarên Bosniyayê ve hatibû xelatkirin.
Helbestên wî helbestvanê Kurd bo ser çendîn zimanên cîhanî hatine wergerandin.
Hamid Bedirxan, helbestvanekî Kurd bû, ji bajarokê Şiyê yê ser bi Herêma Efrînê ya Rojavayê Kurdistanê bû. Wî bi zimanê Erebî dinivîsand û di 29ê Nîsana 1996an de koça dawî kir.
Ev 27 sal in, di ser koça Hamid Berdixan re derbas dibin.
Hisên Hebeş kî ye?
Hisên Hebeş sala 1970 li gundê Şiyê li herêma Efrînê ya Rojavayê Kurdistanê ji dayik bû. Ji dawiya sala 1996an ve li Almanyayê dijî. Heta niha Hebeş gelek berhem çap kirine wek: Noqbûna di nav gulan de (2002) - Reviyayên di çemê Êvrosê re (2004) -Windabûnên ji bo Selîm Berekat (2009) - Taya Bîhokan (2019) - Darên Sermest (2019), Bêzariya Peykerekî Westiyayî (2021) û gelek berhemên din.
Her wisa Hebeş li ser asta wêje û helbesta cîhanî jî çalak e û di gelek festîvalên navneteweyî yên helbestê de li seranserê cîhanê beşdar bûye û helbestên wî li gelek zimanên dinyayê hatine wergerandin.
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse