Komkujiya Kobanî di helbestekê de

Hewlêr (Rûdaw) – Bi boneya çaremîn salvegera êrîşa roja 25ê Hezîranê ya DAIŞê bo ser Kobanî, jineke bi temen a ji vî bajarê Rojavayê Kurdistanê ya bi navê Melîka Ceifer, bi helbestekê behsa roja êrîşê dike.

 

Sibe 25ê Hezîrana 2019an, çaremîn salvegera wê êrîşa DAIŞê bo ser Kobaniyê ye, ku di nav xelkê deverê de weke komkujiya Kobanî tê naskirin.

 

Bi minasebeta bîranîna qurbaniyên wê komkujiyê, jineke bi temen a ji Kobaniyê bi navê Melîka Ceifer, ku dayika peyamnêrê berê yê Rûdawê yê li Kobanî Imer Kalo ye, helbestek nivîsandiye û têde behsa roja êrîşa DAIŞê bo ser vî bajarê Rojavayê Kurdistanê dike.

 

Melîka Ceifer ev helbesta xwe di roja 1ê Hezîrana îsal de nivîsandiye û ji Rûdawê re şandiye.

 

Berbanga roja pêncşemê 25ê Hezîrana 2015an, çekdarên DAIŞê bi cil û bergê YPGê û Artêşa Azad karîbûn di ser xalên kontrolê yên Asayişê re derbasî nava bajarê Kobaniyê bibin. Di wê êrîşa DAIŞê de, bi dehan kes ji xelkê sivîl ên bajêr ji aliyê çekdarên wê rêxistinê ve hatibûn kuştin û birîndarkirin.

 

Komkujiya Kobanî

 

Melîka Ceifer

Dîroka me dûr û dirêje

Serê minî kerr û gêje

Dilê minî parçe û pare

Ez nikanim dûm bibêjim

Şeve reşin li me tarîne

Derî û kolan li me girtîne

Li kolanan hawar û qêrîne

Xwîn li erdê diherike

Dijmin li dora me girtiye

Fişeng û qenas li me danîne

Termên kal û pîran, keç û xortan

Termên bûk û zavan li kolanan reşandîne

Em çi li derve ne çi li hindirin

Haya kesî ji hev nîne

Zarok tev de tî û birçîne

Di nav me de girî û şîne

Em dor xwe dinêrin kes nabînin

Li hawara me kesek nîne

Dijmin dor me hilanîne

Me nas nekir ewana kîne

Zimanê wan bi kurdî ye

Em nizanin Tirk û Ereb û Farisî ne

Dijminê me yên sed salî ne

Hevalên wan kurdên xayînin

Welat û mafê xwe firotine

 

Dîroka me ye dûr û dirêje

Bi şev û royê em dibêjin

Taliya dîroka me ne tê

Hetanî roja qiyametê

 

Kobanî: 01-6-2019