Fîlma Dayikên Şemiyê Xelata Laleya Zêrîn wergirt

Hewlêr (Rûdaw) - Fîlma “Kor Noktada” (Xala Kor) ya Ayşe Polat ku mijara wê çîrokên Dayikên Şemiyê ye li Festîvala Fîlman a Stenbolê Xelata Laleya Zêrîn wergirt.

42emîn Festîvala Fîlman a Stenbolê, roja 18ê Nîsanê hat sazkirin û aktor û fîlmên serkeftî hatin xelatkirin. Fîlmê derhêner Ayşe Polat “Kor Noktada” (Xala Kor), xelata baştirîn film wergirt.

Fîlmê Xala Kor, xelata baştirîn fîlm, baştirîn senaryo û baştirîn çîrok-hûnandin wergirt. Xelata derhênera herî baş jî bo derhênera “Ayna Ayna” Belmin Soylemez hat dayîn.

Derhênera fîlma Xala Kor Ayşe Polat piştî wergirtina xelatê ragihand: “Min îlhama xwe ji Dayikên Şemiyê wergirt. Ez xelatê li ser navê wan werdigrim. Hêvî dikim di demên nêzîk de rojên baş bên.”

Di çarçoveya festîvalê de 134 fîlmên dirêj û 29 kurtefîlm di dema 12 rojan de ji bo sînemahezan hatin nîşandan. Festîval îsal di 14 beşan de, ji 84 welatan bi beşdariya fîlmên 160 derhêneran hat lidarxistin.