Amerîka- Pîrozbahiyên Newrozê dest pê kirin

New York (Rûdaw) – Li Amerîkayê çalakiyên pîrozkirina Newrozê dest pê kirin. Li New Yorkê, kurdên Amerîkayê Newroz pîroz kirin.

Komeleya Kurd-Amerîkî (Kurdish-American Soceity-KAS) li bajarê New Yorkê cejna Newrozê pîroz kir.

Di merasimê de jibilî kurdan gellek amerîkî jî tevlî bûn. Hunermendê kurd Emrah û koma wî ya mûzîkê konser dan û beşdaran jî dîlan û govend girtin.

Serokê KASê Murat Şîmşek di merasimê de axaftinek kir. Şîmşek, behsa şerê DAIŞê û rizgariya Kobanî kir û got, serkeftina Kobanî tenê ya kurdan nîne serketina hemû cîhanê ye ji ber ku DAIŞ hemû cîhanê tehdîd dike.

Yek ji rayedarên KASê bi navê Yûksel Serîndag li ser pîrozkirina Newrozê li New York û Amerîkayê ji Rûdawê re got, em ji sala 2000ê ve heta niha li vir Newrozê pîroz dikin.

Yûksel Serîndag diyar kir ku civaka Amerîkayê zêde nizanin Newroz çiye lê herî dawî bi merasima ku li Koşka Spî hat lidarxistin, Newroz zêdetir hat nasîn.

Çend roj berê xanima yekem a Amerîkayê Michelle Obama, li Koşka Spî merasimek ji bo pîrozkirina Newrozê organîze kiribû. Rûdaw jî ji bo wê merasimê hatibû vexwendin.

Pîrozbahiyên Newrozê dê heta 21ê Adarê li Amerîkayê bidomin.

• Parve bike li ser
• Share on Facebook
• Share on Twitter
• Share on Whatsapp
• Share on Telegram
• Share on Viber
• Share on Messenger