Hewlêr (Rûdaw) – Hevserokê berê yê Partiya Demokratîk a Gelan (HDP) Selahattin Demîrtaş bi boneya koça dawî ya lêkolîner û nivîskarê Kurd Mûnzûr Çem sersaxî ji malbata wî re xwest.
Hevserokê berê yê HDPê Selahattin Demirtaş ku di girtîgeha Edirne de girtiye derbarê koça dawî ya lêkolîner û nivîskarê Kurd Mûnzûr Çem de li ser hesabê xwe yê twitter peyamek bi zazakî belav kir.
Demîrtaş di peyama xwe ya 12ê Kanûnê li ser hesabê xwe yê twitter belavkirî de nivîsiye: “Bi xemginiyeke mezin min agahiya wefata lêkolîner û nivîskarê hêja Munzur Çem ku di pêşxistina Kirmanckî-Zazakî de kedeke mezin daye, bihîst. Ez sersaxiyê ji malbata wî û gelê me re dixwazim, cihê wî biheşt be. Mamostayê hêja em te ji bîr nakin, nadin jibîrkirin."
Ez bi xemgînî pêhesîyaya ke cigêrayox û nuştoxo qîymetin û kedkarê kirmanckî/zazakî mamosta Munzur Çem şîyo rehmet. Sareyê keyeyê ey û şarê ma sax bo, cayê ey cennet bo.
— Selahattin Demirtaş (@hdpdemirtas) December 12, 2022
Ma to xo vîr ra nêkenî, nêdanê vîr kerdene birêz Mamosta. pic.twitter.com/kC5TJpjAD2
Lêkolîner û nivîskarê Kurd Mûnzûr Çem duh li bajarê Berlînê yê Almanyayê koça dawî kiribû.
Mûnzûr Çem di sala 1945an de li gundê Qurze yê navçeya Gêxî ya Çewligê ku berê gundekî Dêrsimê bû ji dayik bûye.
Mûnzûr Çem ku ji destpêka salên 1970yî ve dinivîsand, ji bo kovara mehane ya Rêya Azadî ku di sala 1975an de dest bi weşana xwe kir û ji bo rojnameya Kurdî-Tirkî Roja Welat a ku di sala 1987an de derdiket, berdewamiya nivîsandinê kir. Mûnzûr Çem di van salan de bi Kurdî (zaraveya Kirmanckî/Zazakî) dinivîsand.
Nivîskarê ku li gorî serdemê bi navên cuda nivîsandiye, heta niha gelek pirtûk çapkirine û gelek gotarên wî di kovar û rojnameyên cuda de hatine weşandin.
Nivîskarê ku di van salên dawî de li ser lêkolînên Kirmanckî dixebitî, endamê Koma Stockholmê ya di vî warî de bû û bi awayekî çalak beşdarî xebatên kovara Vateyê bû.
Çem li ser çand, aborî û siyasetê xwedî gelek gotaran e.
Mûnzûr Çem ê ku yek ji damezrînerên Kurd-PENê bû li Berlînê dijiya.
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse