Hewlêr (Rûdaw) – Gelek malperên nûçeyan ê Tirkiyeyê îdia kir ku “Wey Dil” ji bo gerîlayê PKKyê Kamuran Dundar hatiye gotin.
Serokê Şaredariya Bajarê Mezin a Stenbolê Ekrem Îmamoglu, gelek rewşenbîr û hunermend li Stenbolê tevî merasîma bibîranînê bûn ku ji bo resam Ahmet Guneştekîn hat lidarxistin.
Rojdayê di vê merasîmê de kilama “Wey Dil” stra ku yek ji berhemên herî navdar ên Dengbêj Şakiro ye.
Ekrem Îmamoglu piştî merasîmê da zanîn ku kilamê bandor lê kiriye û çavên wî tije rondik bûne.
Piştî van gotinên Îmamoglu, gelek malperên nûçeyan ê Tirkiyeyê îdia kir ku “Ay Dil” ji bo gerîlayê PKKyê Kamuran Dundar (Heval Kamuran) hatiye nivîsîn.
Lê dema mirov li gotinên kilamê dinêre, tê dîtin ku ti pêwendiya gotinan bi Heval Kamuran re nîne.
Gotinên “Ay Dil”ê bi vî rengî ne:
“Wey dil Wey dil
Mîro mîro mîro mîro mîro mîro mîro mîro
Wey dil Wey dil Wey dil Wey dil Wey dil Wey dil Wey dil
Lo rebîyo Xwedê xirab bike dilê bê dil
Fenanî gakî bê weris î bê cil
Fenanî kirasî qolî bê mil
Fena dara bê şalûl û bilbil
Fenanî xasbexçekî rût î bêgul
Bila dilê rezîl bi dil be
Tûrê parsê li mil be
Parsa meriv ne li vir be
Li nava dazdeh duwelê ecnebî
Ûrisan li mala Emerîkanê gêwir be
Parsa meriv birije
Tûrê meriva ê qûl be
Meriv li ber dîwarê evda be
Meriv xwedî kerî nanê garis û cê di gilgil be
Ber seryê meriv kevir be
Malxirabo ser rexa meriv gunî be
Bin rexa meriv postê jûjî be
Tek bila di dêrisê gunda de
Dilê rezîl bi dil be ax dilo hey dil
Tu nizanî min di got qey tu mêr î
Tu camêr î, min digot kotiyê mêran ne li mal e
Tu şeva îşev bişkênî camê camekanê şûşe û penceran, zirza derî
Şeva xwe di nava taxima sîng û berê min esmerê de bibihorî
Min nizanîbû tu ne mêr î, ne camêr î
Tu ji miskînê heramê mêrê min newêrî
Tu nizanî ez ê ne ezeb im, ne bi mêr im
Ka melê gundan, de ez ê bi kaxit û bi nivişt im, bi seyr im
Tu dêhna xwe bidî vê sivengê ez dikim herimê
Lawikê min bû girtiyê taşxana Diyarbekir
Ez ê vê sivengê dikim herim
Dîtina xelkê xwe wey têlî delalê, şebabê, potê
Gelo vê sivengê malxirabo ji tirsa heramê miskînê mêrê xwe newêrim
Ez ê vê sivengê, malxirabo ber tirba Erebê reşê lêvdeqandî
Xîmê binê beriya tewr a jêr im
Hey dil hey dil hey dil ax hey dil hey dil dilo hey dil”
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse