Hewlêr (Rûdaw) – Romana Ferhad Pîrbal, Hotel Ewropa li Îranê hat qedexekirin ku sansur li ser hatiye kirin û rê nehatiye dayîn ku bi Farisî were belavkirin.
Ferhad Pîrbal li ser qedexekirina pirtûka wî ya Hotel Ewropa, ji Rûdawê re ragihand: “Romana Hotel Ewropa piştî ku ji wergêrekî ve bo Farisî hat wergerandin, li Îranê sansur li ser hat kirin û çapkirin û belavkirina wê hat qedexekirin.”
Pîrbal diyar kir, ji ber ku romana Hotel Ewropa behsa melayekî Şîe yê Îranî yê li Parîsê dike, diyar e karektera mela li cem Îranê guncaw nebû, lewma nehiştin bi zimanê Farisî were çapkirin û belavkirin.
Ferhad Pîrbal dibêje, piştî ku pirtûka wî li Îranê hat qedexekirin, çend wergêran soz dane ku li Swêdê bikin Farisî û li wir belav bikin.
Herwiha got ku di demeke nêz de serdana Fransayê dike, ji ber ku li Parîsê navendeke diyar a çap û weşanê, soza çapkirina pirtûkeke wî daye û wî jî ji bo çapkirinê, pirtûka Hotel Ewropayê destnîşan kiriye daku bo zimanê Fransî were wergerandin.
Hêjayî gotinê ye ku pirtûka Hotel Ewropa ya Ferhad Pîrbal, bo zaravayê Kurmancî hatiye wergerandin û ji aliyê weşanxaneya Avesta ve hatiye çapkirin û belavkirin.
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse