Hewlêr (Rûdaw) - Serokê Amerîkayê Donald Trump roja şemiyê bi rêya telefonê bi Serokwezîrê Îsraîlê Benjamin Netanyahu re axivî.
Ev pêwendî di demekê de ye ku Washington xwe ji bo destpêkirina ducare ya bombebarankirina armancên li Îranê amade dike.
Li gorî agahiyên çavkaniyên ku ji bo Wall Street Journalê axivîne, axaftina her du serkirdeyan çend roj piştî wê tê ku Trump li Koşka Spî bi fermandarên payebilind ên leşkerî re civiya.
Di wê civînê de vebijêrkên destpêkirina ducare ya operasyonên mezin ên leşkerî yên li herêmê hatibûn nirxandin.
Ev pêwendî di heman demê de hevdem e li gel hewlên zêde yên Trump ên ji bo teşwîqkirina dengdêrên Komariyan a beriya hilbijartinên nîvdemî.
Şerê li herêmê di raya giştî de nayê ecibandin û bûye sedema bihabûna sotemeniyê û sarbûna coşa alîgirên Partiya Komarî.
Civîna lezgîn a li Tehranê
Li aliyê din, li gorî medyaya Îranê, heman roja pêwendiya telefonî ya Netanyahu û Trump, Rêberê Îranê Mucteba Xamineyî bi fermandarên payebilind ên leşkerî yên Îranê re civiyaye.
Di civînê de behsa îhtimala destpêkirina ducare ya êrişên Amerîka û Îsraîlê yên li ser Îranê hatiye kirin.
Derengiya şeva borî jî Serokê Amerîkayê got ku hîn 1-2 armancên wan li Îranê mane ku lê bidin û yek ji wan Çiyayê Qulingê ye.
Amerîka û Îsraîlê 28ê Sibatê li dijî Îranê şer da destpêkirin.
Îranê jî bi mûşekan û bi dronan li Tel Evîvê û welatên din ên herêmê da û bersiva wan êrişan da.
