Li Los Angelesê helîkopterek ket, 3 kes mirin

Hewlêr (Rûdaw) - Li taxa Chatsworthê ya bajarê Los Angelesê yê Amerîkayê doh êvarê helîkopterek ket xwarê û agir pê ket, di vê bûyerê de 3 kes mirin û kesek jî birîndar bû.

Li gorî daxuyaniya Daîreya Agirvemirandinê ya Los Angelesê (LAFD), tîmên rizgarkirinê li cihê bûyerê rewşa 4 kesan kontrol kiriye û diyar bûye ku 3 kes li cihê bûyerê mirine.

Hat ragihandin ku kesekî birîndar jî rakirine nexweşxaneya herêmê lê li ser rewşa wî ya tenduristiyê agahî nehat dayîn.

Dest bi lêpirsînê hat kirin

Hat eşkerekirin ku Komîteya Neteweyî ya Ewlehiya Veguhastinê (NTSB) û Birêvebiriya Federal a Hewavaniyê ya Amerîkayê (FAA) dê li ser sedema ketina helîkopterê dest bi lêpirsînê bikin.

Helîkopterê dîmenên qezayekê digirtin

Medyaya cihî da zanîn ku ew helîkopter a kanala televîzyonê ya NBC Los Angelesê (KNBC-TV) bûye.

Li gorî nûçeyan, helîkopterê di weşana zindî de dîmenên qezayeke giran a otobusê digirtin ku di wê qezayê de herî kêm 2 kes miribûn.

Kaptanê Daîreya Agirvemirandinê ya Los Angelesê Branden Silverman ji rojnamegeran re got ku ew naxwaze texmînan bike ku ew helîkopter a nûçeyan bûye ji ber ku wan ev agahî hîn bi rengê fermî piştrast nekiriye.

Daîreya Polîsan a Los Angelesê (LAPD) jî da zanîn ku helîkopter ne ya wan e.