Amerîka: Tengava Hurmizê vekirî ye û Îran wê kontrol nake

Hewlêr (Rûdaw) - Fermandariya Navendî ya Hêzên Amerîkayê (CENTCOM) di daxuyaniya xwe ya herî nû de ragihand ku Tengava Hurmizê vekirî ye û Îran wê kontrol nake.

CENTCOMê her wiha destnîşan kir ku hêzên artêşa Amerîkayê ji bo misogerkirina azadiya keştîvaniyê di amadebaşiyê de ne.

"Tengava Hurmizê ji bo keştiyan vekirî ye"

CENTCOMê eşkere kir, "Tengava Hurmizê ji bo hemû wan keştiyên ku dixwazin bi awayekî yasayî di rêreva avî ya navneteweyî re derbas bibin vekirî ye.

Hêzên Amerîkayê ji ber êriş, acizkirin, gef û biryarên kêfî yên Îranê di amadebaşiyê de ne da ku azadiya keştîvaniyê bidome."

Di daxuyaniya Fermandariya Navendî ya Amerîkayê de hat gotin, "Îran tengavê kontrol nake. Hatin û çûyîna keştiyan didome."

Li gorî agahiyên CENTCOMê, hêzên Amerîkayê di du mehên borî de hêsankarî kiriye da ku zêdetirî 800 keştiyan û bêhtirî 400 milyon bermîl petrola xav di Tengava Hurmizê re derbas bibin.

Hat diyarkirin ku tenê di 7 rojên borî de zêdetirî 140 keştiyan di tengavê re derbas bûne.