Hewlêr (Rûdaw) - Serokatiya Sûriyeyê ragihand ku Ehmed Şer li Qesra Gel a li Şamê Serokê Herêma Kurdistanê Nêçîrvan Barzanî û şandeya pê re qebûl kirin.
Di civînê de mijarên hevkariya aborî ya di navbera her du aliyan û ewlehiya herêmê derketin pêş.
Ofîsa Ragihandinê ya Serokatiya Sûriyeyê li ser hevdîtina asta bilind a ku îro li Şama paytext pêk hat daxuyaniyek belav kir.
Li gorî daxuyaniyê, Serokkomarê Sûriyeyê Ehmed Şer, Serokê Herêma Kurdistanê Nêçîrvan Barzanî û şandeya pê re li Qesra Gel qebûl kirin.
Di hevdîtinê de Wezîrê Karên Derve û Koçberan ê Sûriyeyê Esed Şeybanî jî amade bû.
Tekezî li ser hevkariya aborî
Di daxuyaniya Serokatiyê de hat diyarkirin ku xala sereke ya hevdîtinê bipêşxistina pêwendiyên her du aliyan bûye.
Hat diyarkirin ku bi taybetî li ser teşwîqkirina hevkariya di warê aboriyê de û bihêzkirina mekanîzmayên hevahengiyê bi hûrgilî hatiye rawestandin.
Li gorî daxuyaniyê, Ehmed Şer û Nêçîrvan Barzanî rûdanên dawî yên li herêmê û rewşa siyasî ya niha nirxandin.
Serokatiya Sûriyeyê ragihand ku di civînê de ev xalên li jêr hatine destnîşankirin:
· Şopandina mijarên berjewendiya hevbeş ên ku dê piştgiriyê bidin ewlehî û aramiyê
· Avêtina gavên ku dê hevkariya herêmî xurt bikin
· Vekirîhiştina kanalên diyaloga dualî
Di daxuyaniya Serokatiya Sûriyeyê de hat destnîşankirin ku ev hevdîtin hem ji bo vekirina rûpeleke nû ya di pêwendiyên dualî de û hem jî ji bo parastina aramiya herêmê xwedî girîngiyeke mezin e.
