Hewlêr (Rûdaw) - Konseya Boksa Cîhanê (WBC) boksorê Kurd ê ku li Almanyayê ji dayîk bûye Agît Kabayel wekî Şampiyonê Cîhanê yê Sîkleta Giran îlan kir.
Piştî ku şampiyonê cîhanê yê Ukraynayî Oleksandr Usyk dev ji hemû unwanên xwe yên sîkleta giran berda WBCyê ev unwan da Kabayel.
Agît Kabayel di dîrokê de bû yekemîn boksorê Kurd ê ku vî unwanî werdigire.
Her wiha Kabayel piştî efsaneyê boksê Max Schmelingê ku sala 1932yan bû yekemîn welatiyê Almanyayê ku vî navî bi dest dixe.
Piştî 94 salan yekemîn welatiyê Almanyayê ye
Boksorê 34 salî herî dawî 11ê Kanûna Paşîn a îsal li Oberhausenê li hemberî boksorê Polonyayî Damian Knyba kembera xwe bi serkeftî parastibû û unwanê "şampiyoniya demkî" ya WBCyê di destê xwe de girtibû.
Bi biryara konseyê, Kabayel êdî bû Şampiyonê Cîhanê yê Sîkleta Giran.
Kovara Ringê jî li ser hesabê xwe yê Xê daxuyaniyek da û eşkere kir:
"Piştî ku Oleksandr Usyk dev ji unvanên xwe berda, Agît Kabayel bi awayekî fermî wekî Şampiyonê Cîhanê yê Giran ê WBCyê hat îlankirin."
"Serkeftina me hemûyan e"
Agît Kabayel ji rojnameya Bildê re axivî û kêfxweşiya xwe anî zimên: "Ez gelekî serbilind im ku piştî 94 salan, anku piştî Max Schmeling bûm yekemîn şampiyonê cîhanê yê sîkleta giran ê Almanyayê û bûm xelefê wî. Min xeyala xwe pêk anî."
Bangî Usyk kiribû
Kabayel dixwest ji bo unwan derkeve pêşberî Usyk lê Usyk li gorî daxuyaniyên xwe nedixwest bi temamî dev ji kariyera xwe ya boksa profesyonel berde. Kabayel di mehên dawî de gelek caran daxwaza vê maçê kiribû.
Meha sibatê WBCyê bi xwe jî ev maç xwestibû û vê yekê Kabayel gelekî kêfxweş kiribû.
Kabayel rojên borî vîdeoyek belav kiribû û tê de rasterast bangî Usykê 39 salî kiribû û gotibû:
"WBC dixwaze vê maçê bibîne. Alîgir jî dixwazin. Te jî di qadê de ev qebûl kir. Îcar Usyk: Werê em bikin!"
Li hêla din, Kabayel li ser hesabê xwe yê Instagramê jî peyamek belav kir û got:
“Delalên min. Bi rastî min nizanibû ez dê çawa dest bi vê vîdeoyê bikim.
Pêdiviya min bi piçek dema zêdetir heye da ku ez van hemûyan fêm bikim.
17 sal keda dijwar û di dawiyê de, em gihîştin armanca xwe û ya nû...
Loma, ez bi rastî spasiya her kesî dikim ku di vê rêwîtiyê de bi min re bûn û ji bo ku ev yek bibe rastî piştgirî da min.
Piştî hema bêje 95 salan.
Yekemîn şampiyonê cîhanê yê sîkleta giran ê piştî Max Schmeling, yekemîn şampiyonê cîhanê yê Kurd ê sîkleta giran. Bi rastî nayê gotin.
Ez îro gihîştim Spanyayê û min tenê dixwest çend rojan bêhna xwe berdim û li bendê bim ka dê WBC çawa biryarê bide.
Û îro ez pê hesiyam ku em bûne şampiyonê cîhanê yê sîkleta giran.
Nayê zimên. Bi rastî. Ez bê ziman mam. Ez ji dil spasiya we hemûyan dikim ji bo wê piştgiriya mezin a ku we da min.
Hûn hemû bi rastî her roj min motîve dikin û ji bo vê yekê ez gelekî spasdar im.
Ev hemû ji xortekî derketin ku ti kesî bawerî pê nedianî.
Ez bawer dikim piraniya mirovan qet nedifikirîn ku ez dikarim bibim şampiyonê sîkleta giran ê Almanyayê jî.
Û em di pirtûkên dîrokê de li kêleka Muhammad Ali, Mike Tyson û Lennox Lewis in.
Ez hîn jî bi temamî nikarim ji van hemûyan bawer bikim. Cidî me. Spas ji we hemûyan re. Û em dê di rojên bê de di nav pêwendiyê de bin, gelek hezkirinê dişînim.”
Agît Kabayel kî ye?
Boksorê Kurd Agît Kabayel 23yê Îlona 1992yan li bajarê Leverkusenê yê Almanyayê ji dayîk bûye.
Malbata wî dawiya salên 1990î ji navçeya Bazarcixê ya Mereşa Bakurê Kurdistanê koçî Almanyayê kiriye.
Beriya ku dest bi boksê bike bi futbol lîstiye.
Egîdê Kurdan di 18 saliya xwe de, 23yê Hezîrana 2011an li Wuppertalê dest bi kariyera xwe ya profesyonel kir.
Kabayel di asta herêmî de, di navbera salên 2017 û 2019an de şampiyoniya Ewropayê jî di nav de beşdarî gelek pêşbirkên giran bûye.
Wî di salên 2014, 2017, 2018 û 2019an de gelek şampiyoniyên Ewropayê û yên navneteweyî bi dest xistin.
Wî sala 2024an jî Şampiyoniya Parzemîna Amerîkayê ya WBCyê û Şampiyoniya Amerîkaya Bakur a NABOyê biribûn mala xwe.
Beriya ku wekî şampiyonê cîhanê bê îlankirin ew şampiyonê "demkî" yê WBCyê bû û ji aliyê Kovara Ringê ve di rêza 4an a cîhanê de dihat nîşandan.
Agît Kabayel 27ê Hezîrana 2026an bi awayê fermî bû Şampiyonê Cîhanê yê Sîkleta Giran.
