DEM Partiyê dawî li 'Lihevkirina Bajaran' a bi CHPyê re anî

Hewlêr (Rûdaw) - DEM Partiyê ragihand ku dawî li "Lihevkirina Bajaran" a bi CHPyê re hatiye.

DEM Partiyê diyar kir ku ew endamên wan ên ku 31ê Adara 2024an ji lîsteyên CHPyê hatibûn hilbijartin dê vegerin partiya xwe.

Ew endamên meclisên şaredariyan dê ji niha û pê ve karên xwe bi awayekî fermî di bin sîwana DEM Partiyê de bidomin.

Hat destnîşankirin ku ev biryar bi "îradeya hevpar" a endaman hatiye dayîn.

Desteya Birêvebiriya Navendî pesend kir

Desteya Birêvebiriyên Xwecihî yên Demokratîk a DEM Partiyê, îro bi daxuyaniyekê bidawîbûna wê tifaqê eşkere kir.

Di daxuyaniyê de hat destnîşankirin ku di nêzîkî du sal û nîvên borî de di siyaseta Tirkiyeyê de gelek guherîn çêbûne.

DEM Partiyê "operasyonên li ser şaredariyan, danîna qeyûman, desteserkirin û girtina şaredaran" wekî hinek ji wan rûdanan nîşan dan.

Hat zanîn ku li ber ronahiya van rûdanan, bi wan endamên meclisên şaredariyan re ku di çarçoveya "Lihevkirina Bajaran" de hatibûn hilbijartin civînek hatiye kirin.

Di civînê de wan endaman xwesteka xwe ya ji bo veger û karkirina di bin sîwana DEM Partiyê de nîşan daye.

Paşê ev daxwaza wan ji aliyê Desteya Birêvebiriya Navendî ya partiyê ve hatiye pesendkirin.

DEM Partiyê destnîşan kir ku dê xebatên wan ên li meclisên şaredariyan li ser bingeha pêdiviyên bajaran, demokrasiya xwecihî, beşdariya gel û birêvebiriyeke şefaf bidomin.

Bandora li ser Şaredariya Bajarê Mezin a Stenbolê

Li gorî wê biryarê, 12 endamên Meclisa Şaredariya Bajarê Mezin a Stenbolê êdî di lîsteya CHPyê de namînin.

Bi vî awayî hejmara kursiyên CHPyê yên li meclisa wê şaredariyê kêm dibe.

Ev yek jî dê bandorê li ser serdestiya CHPyê ya di meclisa şaredariya wî bajarî de bike.

Beriya vê biryarê, dabeşbûna hejmara endamên Meclisa Şaredariya Bajarê Mezin a Stenbolê bi vî rengî bû:

·         AK Partî: 130 endam

·         CHP: 93 endam

·         Partiya Nû (Yenî Partî): 84 endam

·         MHP: 6 endam

·         Serbixwe: 4 endam

·         BBP (Partiya Yekîtiya Mezin): 2 endam

"Lihevkirina Bajaran" çi ye?

"Lihevkirina Bajaran", stratejiyeke hilbijartinê bû ku ji aliyê DEM Partiyê ve ji bo hilbijartinên xwecihî yên 31ê Adara 2024an hatibû bipêşxistin.

Armanca wê ew bû ku li bajarên mezin ên wekî Stenbol û Mêrsînê, aliyên cuda yên civakê bîne cem hev.

Di çarçoveya vê stratejiyê de, DEM Partiyê bi aliyên mixalefetê û bi taybetî jî bi CHPyê re hevahengî kiribû.

Li ser vê bingehê, DEM Partiyê li hinek navçeyan (wekî mînak, li Esenyurta Stenbolê yan jî li Akdenîza Mêrsînê) namzed dernexistin û piştgirî da namzedên CHPyê.

Her wiha navên hinek endamên DEM Partiyê jî di lîsteyên meclisên şaredariyan ên CHPyê de cih girtibûn.