Ayşegul Dogan: Di rewşeke wiha de mirov çawa dikare ji aştiyê bawer bike?

Hewlêr (Rûdaw) - Berdevka DEM Partiyê Ayşegul Doganê bertek nîşanî astengkirina hesabên Xê yên rojnameger, nivîskar, parêzvanên mafan û Akademîsyenên Aştiyê da û pirsî: “Di rewşeke wiha de mirov çawa dikare ji aştiyê bawer bike?”

Ayşegul Doganê diyar kir ku bûyerên dawî "Pêvajoya Aştî û Civaka Demokratîk" lawaz dikin û got:

"Mirov dikare tenê bi xurtkirina demokrasiyê piştgiriyê bide pêvajoyê."

Berdevka DEM Partiyê Ayşegul Doganê li ser hesabê xwe yê Xê bertek nîşanî astengkirina hesabên Xê yên rojnameger, nivîskar, parêzvanên mafan û Akademîsyenên Aştiyê da.

Doganê destnîşan kir ku rewşa siyasî û civakî ya welêt, ji bo "Pêvajoya Aştî û Civaka Demokratîk" cihê metirsiyê ye.

Wê da zanîn ku gava beşên cuda yên civakê dibin armanca êrişan û dabeşbûn kûr dibe û baweriya gel bi gotinên aştiyê jî namîne û got:

"Eger mirovek ji dûr ve jî li bûyerên van rojên dawî yên li welêt binêre, dê bi hêsanî bibîne ku ev yek ji bo têkbirina Pêvajoya Aştî û Civaka Demokratîk e."

“Gelo mirov çawa dikare ji aştiyê bawer bike?”

Doganê bal kişand ser kûrbûna cudakariya civakî û ev pirs kir: "Gava her roj beşeke civakê dibe armanc, rastî êrişan tê û dabeşbûn hew qasî kûr dibe, gelo mirov çawa dikare ji aştiyê bawer bike û xelkê jî bide bawerkirin?"

Ayşegulê diyar kir ku piştevaniya civakî ya ji bo pêvajoya aştiyê, tenê bi berfirehkirina qada demokratîk dikare pêk bê û got: "Piştgirîkirina pêvajoyê, tenê bi xurtbûna demokrasiyê pêkan e."

Berdevka DEM Partiyê girtina hesabên Xê yên parêzvanên mafan, rojnameger, nivîskar û Akademîsyenên Aştiyê jî bi tundî rexne kir.

"Nayê qebûlkirin"

Wê diyar kir ku biryarên bi vî rengî rasterast destewerdana li azadiya derbirînê û rêxistinbûnê ne û wiha axivî:

"Di atmosfereke ku em qala aştî û demokrasiyê dikin de girtina hesabên Xê yên parêzvanên mafan, rojnameger, nivîskar û Akademîsyenên Aştiyê qet nayê qebûlkirin.

Astengkirina hesabên medyaya civakî, li dijî azadiya derbirînê û rêxistinbûnê destwerdaneke giran e."

Berdevka DEM Partiyê di dawiya peyama xwe de got: "Parêzvanên mafê jiyanê, rojnameger, nivîskar û Akademîsyenên Aştiyê bê deng namînin! Ewlehiya me hemûyan, tenê bi serdestiya hiqûqê, demokrasî û azadiyan pêk tê."