Hewlêr (Rûdaw) - Serokkomarê Îranê Mesûd Pizîşkiyan rexne li têkdana bajarên Urmiye û Mehabadê girt û got, "Demekê ji Urmiyê re digotin Parîsa Îranê lê niha wekî Efxanistanê lê tê kirin."
Serokkomarê Îranê Mesûd Pizîşkiyan li bajarê Urmiyeyê yê Rojhilatê Kurdistanê bi hejmarek çalakvan û berpirsên parêzgehê re civiya.
Mesûd Pizîşkiyan di gotara xwe de got, bajar hatine têkdan û wekî mînak behsa bajarên Urmiye û Mehabadê kir.
Pizîşkiyan amaje pê kir ku ew bi xwe li Mehabadê ji dayîk bûye û li Urmiyeyê mezin bûye û anî ziman:
"Dema ez dibînim ku wisa li Mehabadê kirine, ez matmayî dimînim.
Bajarekî din bû lê niha ew kirine tiştekî din."
Serokkomarê Îranê her wiha derbarê Urmiyeyê got:
"Demekê ji Urmiyeyê re digotin Parîsa Îranê lê niha hindik maye ku wekî Efxanistanê lê bê kirin."
Rexneyên Serokkomarê Îranê derbarê têkdana şêwaza avahîsazî û xwezayî û jîngeha bajaran bûn û wî planên bipêşxistinên bajaran wekî neguncav bi nav kir.
Pizîşkiyan daxwaza alîkariyê ji pispor û mamosteyên zanîngehê kir ku ji bo bipêşxistina bajarên Urmiye, Mehabad, Xoy, Makû û Bokanê planeke berfireh deynin.
Pizîşkiyan da zanîn ku divê nexşeyeke bipêşxistinê ya zelal hebe da ku "her birêvebir yan berpirsek nikaribe li gorî daxwaz û dilê xwe, planên bipêşxistin û berfirehkirinê deyne".
.webp&w=3840&q=75)
