Hewlêr (Rûdaw) - Parlamentera Yekîtiya Ewropayê rola Nêçîrvan Barzanî ya di piştgiriya azadiya derbirînê û civaka sivîl de bi erênî nirxand û da zanîn ku ne tenê ji bo Kurdan ew dikare bibe “serkirdeyekî rasteqîn ê tevahiya herêmê”.
Parlamentera Yekîtiya Ewropayê Ebîr Sehlaniyê di daxuyaniyekê de pîrozbahî li hewl û piştgiriyên Serokê Herêma Kurdistanê Nêçîrvan Barzanî yên ji bo medyaya azad kir û ragihand:
“Rêzdar dikare bibe serkirdeyekî rasteqîn ê tevahiya herêmê, ne tenê ji bo Kurdan, ji bo Îraqiyan jî li Îraqê û hemû neteweyên derdora Îraqê.”
Ebîr Sehlaniyê sedema vê nêrîna xwe bi wê cureyê serokatiyê ve girê da ku Rojhilata Navîn pêwîstiya wê pê heye û got:
“Eger tiştek hebe ku li Rojhilata Navîn pêwîstiya me pê hebe, ew serkirdeyekî rasteqîn e ku baweriya wî bi mirovan hebe, baweriya wî bi wê yekê hebe ku mirov bi azadî ji dayîk bûne û azadî di rastiyê de rûmet e, pêbend be bi rûmeta gelê xwe û rûmeta gelên din jî garantî bike.”
Sehlaniya ku sala 2012an dema Nêçîrvan Barzanî serokwezîr bû pê re hevdîtin kiribû, anî ziman:
“Ez dibînim ku Rêzdar Nêçîrvan Barzanî bi rastî xwedî wê şiyanê ye û ez hêvîdar im ku karibe di vê rêwîtiyê de bi ser bikeve.”
Ebîr Sehlaniyê piştgiriya Parlamentoya Ewropayê ya ji bo hêzên demokratîk ên Herêma Kurdistanê ducare kir û got:
“Hemû hêzên erênî û demokratîk ên azad ên li Kurdistanê dikarin her tim pişta xwe bi piştgiriya Ewropayê ya li Parlamentoya Ewropayê ve girê bidin.
Em her tim li gel we disekinin.”
.webp&w=3840&q=75)
