Hewlêr (Rûdaw) - Birêvebiriya Giştî ya Saziya Meteorolojiyê ji bo piraniya parêzgehên Bakurê Kurdistanê hişyariya berf, baran û bahozê da.
Birêvebiriya Giştî ya Saziya Meteorolojiyê ya Tirkiyeyê îro rapora xwe ya li ser pêşbîniyên rojane yên keş û hewayê belav kir.
Li gorî raporê, li seranserê Bakurê Kurdistanê barana bi navber û baraneke gur tê çaverêkirin.
Li bilindahiyên bakur û rojhilatê herêma Serhedê dê barana bi berf an jî bi temamî berf bibare.
Li kîjan bajaran dê baraneke gur bibare?
Tê çaverêkirin ku baran li Dêrsim, Çewlîg û Mûşê, li rojavayê Bedlîsê, li deverên bakur ên Wanê û li başûrê rojavayê Mereşê bihêz û bibandor be.
Her wiha li Amed, Sêrt û Êlihê jî dê baraneke gur bibare.
Ji bo parêzgeha Colemêrgê û derdora wê jî hişyariya ba û bahozê hatiye dayîn.
Pileyên germê li bajaran
Pileyên germê li hinek parêzgehên Bakurê Kurdistanê wiha ne:
Erzirom 8, Qers 9, Meletî 16, Wan 11, Amed 15, Mêrdîn 13, Sêrt 13 û Riha 18 pile.
Saziya Meteorolojiyê ji welatiyan xwest ku li hemberî pêşhatên neyînî yên keş û hewayê baldar bin û tedbîrên pêwîst werbigirin.


