Hewlêr (Rûdaw) - Endamê Konseya Birêvebir a KCKyê Murat Karayilan diyar kir ku "Em dixwazin bi pêşxistina stratejiyeke nû serdemeke nû li herêmê bidin destpêkirin."
Murat Karayilan ji malpera "The Amargi" re axivî û mijarên wekî çareseriya pirsgirêkên Kurdan, dîroka şer û pevçûnên navbera Tirkiye û Kurdan, derbasbûna ji têkoşîna çekdarî ber bi siyaseta demokratîk ve, pêvajoya aştiyê û vekişîna hêzan nirxand.
"Divê dewlet dest ji înkarê û Kurd jî dest ji serhildanê berdin"
Karayilan di beşeke hevpeyvîna xwe de destnîşan kir ku ji bo çareseriya pirsgirêkên Kurdan divê polîtîkayên înkar, tunekirin û asîmîlasyonê bi dawî bibin.
Wî her wiha anî ziman ku divê Kurd jî dest ji serhildanê berdin û berê xwe bidin entegrasyona demokratîk û wiha lê zêde kir:
"Angaşta me ew e ku ev pêvajoya nû ne tenê ji bo Kurdan lê ji bo dewletên herêmê jî bibe modeleke mînak.
Em dixwazin bi stratejiya nû re pêvajoyeke nû bidin destpêkirin. Em parastina wê yekê dikin ku dewletên serdest dest ji polîtîkayên asîmîlasyon, înkar û tunekirinê berdin û Kurd jî dest ji serhildanê berdin.
Ne înkar û tunekirin, ne jî serhildan... Li şûna vê divê entegrasyona demokratîk were bipêşxistin."
Karayilan diyar kir ku ew nêzîkî 53 sal in têkoşînekê dimeşînin û ev têkoşîn pir dijwar û tijî fedakariyan bûye.
Karayilan anî ziman ku ti berjewendiyên wan ên kesane û bendewariyên wan ên madî nînin, wan jiyana xwe di ber vê têkoşînê de daniye û wiha pê de çû:
"Em ne tenê xwe feda dikin, me jiyana xwe di xizmeta doza xwe de borandiye. Em ji ramanên Rêber Apo bawer dikin. Ji bo serkeftin û pêkanîna vê ramanê em têdikoşin."
Karayilan bal kişand ser dijwariya têkoşîna xwe û got ku ew dizanin kî ne, çi kirine û çi bi dest xistine.
"Dîroka nakokiya navbera Kurdan û Tirkiyeyê digihîje 220 sal berê"
Karayilan li ser dîroka şer û nakokiyên navbera Kurdan û Tirkiyeyê axivî û diyar kir ku ev pêvajo digihîje nêzîkî 220 sal berê.
Karayilan da zanîn ku ji serdema Ebdulah Babanzade ve di navbera Împaratoriya Osmanî û Kurdan de şer û pevçûn derketine û piştî serdema Osmanî, di navbera Komara Tirkiyeyê û Kurdan de jî ev nakokî berdewam kirine.
Karayilan anî ziman ku di vê pêvajoyê de gelek komkujî çêbûne û serhildan derketine, wî têkoşîna ku dimeşînin jî wekî serhildaneke bi plan, bi bername û bi rêxistinî bi nav kir.
Karayilan diyar kir ku piştî têkoşîna çekdarî ya ku gelek salan berdewam kir, êdî hewcedarî bi rêbazên dîtir heye.
Wî parast ku şer rola xwe lîstiye û hin encam hatine bidestxistin û berdewam kir:
"Ji vir û pê ve divê siyaset were meşandin. Em dibêjin ku êdî divê siyaset encam bigire. Bêguman em hîn negihîştine encamê lê em dixwazin rêbaza têkoşîna xwe biguherînin.
Di vê serdemê de di esasê de divê mirov ji rêbaza têkoşîna çekdarî dûr bikeve."
"Pirsgirêkên Kurdan hat ser maseyê lê Tirkiyeyê ev qebûl nekir"
Karayilan diyar kir ku têkoşîn di sala 1984an de dest pê kiriye, di salên 1990î de pirsgirêkên Kurdan zêdetir xuya bûye û pirsgirêk hatine ser maseya mizakereyê.
Karayilan anî ziman ku di serdemeke wiha de ku hebûna Kurdan ji aliyê dewleta Tirk ve dihat înkarkirin, nîqaşkirin û çareserkirina vê meseleyê bi rêya diyalogê hewce bû, tevî vê yekê wî angaşt kir ku Tirkiyeyê bi salan nêzîkatiya çareseriyê qebûl nekiriye û wiha got:
"Pirsgirêkên Kurdan hat ser maseyê. Diviya pirsgirêk li ser maseyê bihatana nîqaşkirin û bi diyalogê bihatana çareserkirin lê dewleta Tirkiyeyê 33 salan ev qebûl nekir."
Karayilan diyar kir ku wan di pêşerojê de gelek caran hewl dane lê ev hewldan bêencam mane.
Wî angaşt kir ku Tirkiye carinan mîna ku qebûl dikir dixuya lê piştî wê bi paş de gav diavêt.
Wî da zanîn ku neh caran agirbest hatiye ragihandin û wiha destnîşan kir:
"Neh caran agirbest hat ragihandin. Dewleta Tirkiyeyê her carê dîsa berê xwe da şer. Êdî divê em şer rawestînin û rêyeke din bixin dewrê."
"Em dikarin biratiyê di navbera Kurd û Tirkan de ava bikin"
Karayilan di nirxandinên xwe yên li ser pêvajoya aştiyê de diyar kir ku ew dixwazin serdemeke nû bidin destpêkirin û got ku biratî dikare di navbera Kurd û Tirkan de were sazkirin.
Karayilan anî ziman ku ji aliyê dewletê ve jî di vî warî de bang hatine kirin û hinek rayedarên dewletê daxuyaniyên wekhev dane, wî diyar kir ku Abdullah Ocalan bersiveke erênî daye van bangan û wiha lê zêde kir:
"Êdî divê em aştiyê ava bikin. Em dibêjin em dikarin biratiyê di navbera Kurd û Tirkan de ava bikin. Em jî dixwazin wiha bibe."
Karayilan diyar kir ku divê rêbaza têkoşînê were guhertin, wî parast ku li şûna têkoşîna çekdarî divê siyaseta demokratîk û rêya aştiyê were bipêşxistin û Karayilan wiha axivî:
"Divê em rêbaza aştiyê ya nû bi pêş bixin. Divê em rêbaza têkoşîna xwe biguherînin. Di nav rêbazên têkoşînê de têkoşîna çekdarî jî hebû lê êdî em difikirin ku divê em stratejiya xwe biguherînin, stratejiyeke nû bi pêş bixin.
Divê em stratejiya siyaseta demokratîk ji xwe re bikin esas."
Karayilan li dijî vê yekê got ku di rewşa her êrişekê de mafê her kesî heye ku xwe biparêze.
Karayilan diyar kir ku ew dixwazin rêbazeke nû û rêyeke nû bi pêş bixin û destnîşan kir ku di pêvajoyê de divê mijara aştiyê bêhtir were nîqaşkirin.
Vekişîna hêzan û pêvajoya aştiyê
Di hevpeyvînê de derbarê mijara vekişîna hêzan jî hat axaftin. Karayilan, li ser pirsên derbarê vekişîna hêzan a ji Tirkiyeyê, derbasbûna wan a li Herêma Kurdistanê an jî Qendîlê û dê ev pêvajo ka çawa were nirxandin, diyar kir ku gelek aliyên cuda yên pêvajoya aştiyê hene.
Karayilan anî ziman ku Abdullah Ocalan ji bo aştiyê sê şert diyar kirine û mijarên rawestandina çekan û danîna çekan a aliyan hatine rojevê.
Karayilan diyar kir ku divê hevdîtin û diyalog berdewam bikin û da zanîn ku di vê pêvajoyê de hinek şande çûne Îmraliyê, bi Ocalan re hevdîtin kirine û derbarê mijarên cuda gotûbêj hatin kirin.
Karayilan diyar kir ku ji bo avakirina aştiyê gavên mîna avakirina şandeyên siyasî jî hatine rojevê lê wî parast ku pêvajoya ku nêzîkî du salan e berdewam dike hîn negihîştiye qonaxeke ku baweriyê ava bike.
Karayilan anî ziman ku ji bo aştî pêkan bibe, divê polîtîkayên înkar û asîmîlasyonê bi dawî bibin. Wî diyar kir ku divê mijara vekişîna hêzan jî di vê çarçoveyê de were nirxandin.
Karayilan di axaftina xwe ya li ser pêvajoyê de got ku ew ne di nav nêzîkatiyeke bi temamî erênî û ne jî bi temamî neyînî de ye û wiha pê de çû:
"Di vê pêvajoyê de em rêbaza têkoşîna xwe jî dikin mijar. Em dixwazin rêyên nû vekin, rêya aştî û çareseriyê bi pêş bixin."
Karayilan angaşt kir ku tevî ku pêvajo nêzîkî du salan e berdewam dike, ji aliyê dewleta Tirkiyeyê ve hîn gavên ku baweriyê ava bikin û aliyan qaneh bikin nehatine avêtin.
"Em bi encama diyalogê ji Metînayê vekişiyan, TSKyê nedikarî me ji wir derxista"
Karayilan behsa mijara vekişîna ji herêma Metînayê jî kir û angaşt kir ku ew di encama peymaneke ku bi Tirkiyeyê re hatiye çêkirin ji wir derketine.
Karayilan angaşt kir ku Hêzên Çekdar ên Tirk (TSK) ne xwediyê wê hêzê bûn ku wan ji Metînayê derxînin û parast ku vekişîn di çarçoveya peymanekê de pêk hatiye û wiha lê zêde kir:
"Me 40 sal şer meşand. Dewleta Tirk bi ser neket. Xwe serkeftî nîşan dide lê rewşa li Metînayê li ber çavan e. Em bi diyalogê ji Metînayê vekişiyan."
Murat Karayilan wiha dawî li axaftina xwe anî, "Metîna bi bikaranîna zorê ji me nehat standin, ev rastiyeke dîrokî ye.
Bila kes vê rastiya dîrokî ya li ber çavan înkar neke. Heger înkar bikin, em dê dîmenên vekişîna di destê xwe de biweşînin."
.jpg&w=3840&q=75)
