Hewlêr (Rûdaw) - Parêzgarê Hisîçayê Nûredîn Ehmed ji Rûdawê re ragihand ku kar û xebatên niha yên entegrasyonê di çarçoveyeke asayî de berdewam dikin û giranî li ser temamkirina pêvajoya entegrasyon û çalakkirina saziyan e.
Parêzgar Nûredîn Ehmed diyar kir ku piraniya gavên destpêkê qediyane û karên di vî warî de bi awayekî erênî berdewam dikin.
Parêzgarê Hisîçayê eşkere kir ku dosyeyên herî girîng ên ku mane û niha kar li ser wan tê kirin ev in:
• Vegerandina koçberan.
• Dosyeya ziman û bernameyên xwendinê.
• Çalakkirina pergala dadweriyê.
• Tayînkirinên taybet ên ji bo navçe, nahiye û şaredariyan.
Parêzgar destnîşan kir ku piştî temamkirina gavên bingehîn ên amadehiyê û dîtina bipêşveçûneke erênî ya di xalên navborî de, dê mijarên din ên mayî jî wekî encameke misoger werin dîtin.
Parêzgarê Hisîçayê derbarê sektora çandiniyê û cotkarên Hisîçayê û bi taybetî jî li ser mekanîzmaya dayîna pereyê genim agahî dan Rûdawê û destnîşan kir ku hewldanên wan ên ji bo çareserkirina vê dosyeyê berdewam dikin û got:
"Niha em fişarê dikin da ku maf û heqdestên darayî yên cotkaran bên dayîn, îro pereyê cotkaran li her du şaxên bankê yên li navçeyên Dêrik û Çilaxayê tê belavkirin."
