Hewlêr (Rûdaw) - Serokwezîrê Herêma Kurdistanê Mesrûr Barzanî ferman da Wezareta Darayî û Aboriyê û şandeya dan û standinê ya Herêma Kurdistanê û xwest ku mafên darayî yên Hêzên Pêşmergeyan di budceya federal a sala 2027an de werin misogerkirin.
Encûmena Wezîran a Herêma Kurdistanê îro civiya.
Civîn bi serokatiya Serokwezîr Mesrûr Barzanî û bi beşdariya Alîkarê Serokwezîr Qubad Talebanî hat lidarxistin.
Xerciyên Pêşmergeyan di budceya federal de
Li gorî daxuyaniya Hikûmeta Herêma Kurdistanê, Mesrûr Barzanî ji bo misogerkirina mafên darayî yên Hêzên Pêşmergeyan fermanek da.
Di vê fermanê de Wezareta Darayî û Aboriyê û şandeya bilind a dan û standinê ya Herêma Kurdistanê hatin wezîfedarkirin.
Di çarçoveya fermanê de daxwazek hat kirin.
Hat xwestin ku şande ji bo cihgirtina xerciyên Hêzên Pêşmergeyan di nav xerciyên serweriyê yên budceya federal de bixebitin.
Serokatiya Encûmena Wezîran a Herêma Kurdistanê 6ê Çiriya Pêşîn a 2026an bi hejmara 12 hezar û 649an nivîseke fermî belav kiribû.
Di wê nivîsê de hatibû destnîşankirin ku Herêma Kurdistanê bi para xwe ya ji budceya federal beşdarî dabînkirina xerciyên serweriyê dibe.
Hat eşkerekirin ku ev beşdarî xerciyên Pêşmergeyan jî li xwe digire.
Bingeha wekheviyê li gel hêzên Îraqê
Her wiha di nivîsê de hat diyarkirin ku divê di dan û standinên li ser budceya federal a sala 2027an de xebat bên kirin.
Ev xebat dê ji bo misogerkirina meaş, alîkarî û hemû mafên darayî yên Hêzên Pêşmergeyan bin.
Hat eşkerekirin ku proje, perwerde û pêdiviyên alavan jî di nav van mafan de cih digirin.
Her wiha hat gotin ku divê Hêzên Pêşmergeyan wekî hevtayên xwe yên li hikûmeta federal li gorî pîvanên wekhev werin miamalekirin.
Hikûmeta Herêma Kurdistanê di daxuyaniya xwe de bal kişand ser giringiya hevahengiya temam a bi fraksiyonên Kurd ên li Bexdayê re.
Ev hevahengî ji bo parastina vê daxwazê di qonaxên amadekirin û pesendkirina budceya sala 2027an de gelekî pêwîst e.
