Banka Cîhanî zerara erdhejê eşkere kir

Hewlêr (Rûdaw) - Li gor rapora Banka Cîhanî, tê pêşbînîkirin zerara erdhejên Mereşê ku bandor li 11 bajaran kir 34.2 milyar dolar be.

Banka Cîhanî zerara erdhejên Mereşê hesab kir û “rapora nirxandina zerarê” eşkere kir. Di raporê de bo ser hejariya li herêmê û koçberên Sûriyeyî bal hatiye kişandin.

Di raporê de hatiye destnîşankirin, dê zerara erdhejê ligel erdhejên paşekî û rawestandina bazirganiyê zêdetir bibe. Li gor raporê milyonek û 250 hezar kes bê mal mane, ku avahiyên wan hilweşiyane yan zerareke zêde dîtine.

Li gor raporê %81ê zerarê li bajarên Hatay, Mereş, Dîlok, Meletî û Semsûrê çêbûye, li wan bajaran 6 milyon û 450 hezar kes dijî. %53ê zerarê ji ber avahiyên sivîl ên hilweşiyayî, ku dike 18 milyar dolar, %28 ji ber avahiyên hikumî yên hilweşiyayî, ku dike 9.7 milyar dolar û %19 ji ber rê, pir, ban, av û elektrîkê ku dike 6.4 milyar dolar çêbûye.

Cîgira Serokê Herêma Ewropa û Asya Navîn ê Banka Cîhanî Anna Bjerde ragihand, “Em hevxemê xelkên Tirkiye û Sûriyê ne ku êşeke zêde dîtin.”

Banka Cîhanî 9ê Sibatê ragihandibû, dê 1.78 milyar dolar alîkarî bide herêmên erdhejê.

• Parve bike li ser
• Share on Facebook
• Share on Twitter
• Share on Whatsapp
• Share on Telegram
• Share on Viber
• Share on Messenger