Li Mûşê bi sedan cotkar tûtinê diçînin û difroşin gelek welatên cîhanê
Hewlêr (Rûdaw) – Li bajarê Mûşê yê Bakurê Kurdistanê cotkarên tûtinê îsal li hêviyê ne ku 3 hezar ton tûtin kom bikin.
Li Bakurê Kurdistanê çend navçe hene ku tûtina wan gelekî navdar e û ketiye stran û helbestan jî.
Tûtina Xursê, tûtina Semsûrê û tûtina Mûşê.
Li Mûşê bi sedan cotkar tûtinê diçînin û difiroşin gelek welatên cîhanê.
Cotkar îsal li hêviyê ne ku 3 hezar ton tûtin kom bikin lê dibêjin çandin û xwedîkirina tûtinê karekî zehmet e.
Tûtin, yek ji çavkaniyên sereke ê dahata xelkê wê deverê ye.
Serokê Yekîtiya Koperatîfên Berhemanîn û Firotina Tûtinê Şêxmûs Solgun
"Li bajarê Mûşê li gel 400 berhemhênerên tûtinê girêbesta me heye. Em li bendê ne berhema îsal 3 hezar ton be.
Xwedê hezkê di salên pêş de em dê rêjeya berhemanînê zêdetir bikin. Berhemhênana tûtinê karek zehmet e.
Wekî hûn dibînin mirovên me zivistan û havînan di nav hemû şert û mercan de vî karî dikin."
Li Mûşê îsal 620 cotkaran li ser 5 hezar donim zevî tûtin çandine.
Ew salê 12 mehan bi berhemanîna tûtinê ve mijûl dibin.
Tûtin çavkaniyeke girîng a dahatê ye ji bo xelkê wê parêzgehê ku debara jiyana xwe bi vî karî dikin.
Cotkar Leyla Taşinê jî got, “Em debara jiyana xwe û mesrefa xwendina zarokên xwe bi dahata vê tûtinê dabîn dikin.”
Cotkar Mustafa Demir jî got, “Min 150 donim tûtin çandiye. Ez di bazarê de 200 donimî jî dikirim û difroşim kompanyayan."
Tûtina Mûşê bi rêya kompanyayan destpêkê ji parêzgeha Îzmîrê ya Tirkiyeyê re tê şandin û ji wir hinardeyî welatan tê kirin.
Li gorî çavkaniyên fermî, sala borî ji parêzgehên Bakurê Kurdistan û Tirkiyeyê ji 48 welatan re 53 hezar ton tûtin hatiye hinardekirin.
Ji wê tûtinê 276 milyon dolar hatine bidestxistin ku derdora ji sedî 5ê wê ya Mûşê bûye.
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse