رێكخراوێكی كورد و ئێرانی لە بەریتانیا: كچی تەمەن 9 ساڵ بەشوو دەدرێن

لەساڵی 2010دا 30 كچ لە شاری لەندەن بە زۆر بەشوو دراون

رووداو - Islington Tribune
بەپێی قسەی سەرۆكی رێكخراوێكی تایبەت بە مافەكانی ئافرەتان لە بەریتانیا، ژمارەیەكی زۆر لە كچان لە تەمەنی منداڵی لە بەریتانیا بەناچاری بەشوو دەدرێن.
بەپێی قسەی سەرۆكی رێكخراوی مافی ئافرەتانی كورد و ئێرانی IKWRO، تەنیا لەساڵی 2010دا نزیكەی 30 كچ لە شاری لەندەن بەزۆر بەشوو دراون.
ئەم دیاردەیەش، لەلایەن ئیمامی مزگەوتی گەڕەكی ئیسلینگتۆنی نێوەڕاستی شاری لەندەن ئیدانەكرا و رایگەیاند كە كردەوەی لەوجۆرە دژی ئایینی ئیسلامن.
ئەو رێكخراوە چەند مانێگكیش لەمەوبەر ئاشكرای كرد كەوا نزیكەی 3 هەزار كەیسی "شەرەفكوژی" لە بەریتانیا تۆماركراوە لەساڵی 2010، بەپێی راپۆرتێكی ئەو رێكخراوە سێ كچی تەمەن 11 ساڵ لەشاری لەندەن بەزۆر بەشوودراون لەگەڵ دوو كچی تەمەن نۆ ساڵ.
هەروەها ئەو رێكخراوە ئاشكرای دەكات كە رەنگە بە سەتان كچی لەندەن دووچاری چەندین تووندوتیژی ببن لەئەنجامی بەزۆر بەشوودانیان، ئەو رێكخراوە داوا لە مامۆستا و توێژەرانی كۆمەڵایەتی و پۆلیس دەكات بەجیدی كار بۆ رێگەگرتن لەوە بكەن.
بەپێی زانیارییەكانی وەزارەتی دادی بەریتانی، تەنیا لەساڵی رابردوودا 32 حالەتی چاودێری هەبووە بۆ كەیسی بەزۆر بەشوودان لە بەریتانیا و شەش لەو كەیسانەش بۆ كچانی خوار تەمەن 16 ساڵ بووە.
هەروەها لە زۆربەی كەیسەكانیشدا قوربانییەكان قسەیان نەكردووە، لەترسی كوژران .
دیانا نامی، كە سەرۆكی ئەو رێكخراوە كوردی-ئێرانییەیە، روونیكردەوە كە كچەكان لە مزگەوتەكان مارەدەكرێن، كە ئەمەش بەپێی یاسای بەریتانی، كارێكی نایاساییە و بەم هۆیەشەوە هێزەكانی پۆلیس ئاگاداری تووندوتیژییەكان نابن.
لەوبارەوە دیانا دەڵێ " ئەو كچانە هێشتا ئەركەكانی خۆیان بەجێدەگەیێنن و ئێشی نێو ماڵ دەكەن ، دواتریش دەچنە قوتابخانە و پاشانیش لەگەڵ مێردەكانیان دەبن. لەبەرئەوە ئەوانە ژنی ماڵەوەن، بەڵام بە جلوبەرگی قوتابخانەوە".
لەدرێژەی قسەكانیدا، گوتی" هۆكاری ئاشكرانەبوونی رەوشی ئەو كچانە، دەگەڕێتەوە بۆ ئەو ترسەی هەیانە و هەروەها ئەو كۆنتڕۆڵە تووندەی خێزانەكانیان بەسەریانەوە".
دیانا ئەوەش ئاشكرا دەكات كە ماوەیەك لەمەوبەر كچێكی تەمەن 13 ساڵ لە قوتابخانە بەدزییەوە تەلەفۆنی بۆ ئەوان كردووە، تاوەكو لە بارودۆخی خۆی ئاگاداریان بكاتەوەو لەوبارەوە ناوبراو گوتی "تەنانەت مامۆستاكەشی نەیزانیبوو، بەبیانوی ئەوەی دەچێتە توالێت، بەڵام دوای ئەوەی دەگەڕێتەوە بۆ ماڵ، باوكی لێیدەدات، لەبەرئەوەی باوكی كچەكە، مامێكی تەخانكردووە بۆ سیخوڕیكردن بەسەر كچەكەیەوە و مامیشی لە پەنچەرەی پۆلەكەوە بینیویەتی كە كچەكەی بەدزییەوە تەلەفۆنی كردووە".
دیانا دەڵێ "كچەكە بەزۆر بەشوودراوەو دراوەتە خزمێكی ئەو بنەماڵەیە، بۆ ئەوەی كچەكەیان پەیوەندی لەگەڵ كەسێكی بیانی نەبەستێت".
هەروەها دیانا ئاماژە بەوەشدەكات كە هۆكاری دیكەی ئەم دیاردەیە، داراییە، لەبەرئەوەی كاتێك كچەكە بەشوو دەدرێت، پێویستە لەسەر مێردەكەی هەموو شتێكی بۆ دابین بكات و یارمەتی ماڵی باوكی كچەكەش بدات، لەبەرئەوە، ئەمە رێگەیەكی دیكەیە بۆ بەدەستهێنانی پارەیەكی ئاسان.
ئەحمەد سەعد كە ئیمامی مزگەوتی ئەو گەڕەكەی شاری لەندەنە، پێیوایە كە ئەمە دیاردەیەكی بڵاو نییە لە ئیسلامدا، بەڵكو دیاردەیەكە پەیوەستە بە كولتوورەوە و لەوبارەوە گوتی " ئەوە پەیوەندی بە دواكەوتوویی خەڵكەكەوە هەیە، ئەم دیاردەیە لە وڵاتانی خۆیان دەكرێ و ئێستاش هەر دووبارەی دەكەنەوە، لەبەرئەوە ئەو كەسانە دەیخەنە ملی ئیسلام و دەڵێن لە قورئاندا هاتووە، بەڵام بەپێی ئیسلام، ئەو كارە، كارێكی قبوڵكراو نییە".
هەروەها ئەو ئیمامە ئاشكراشیكرد كە ئەو مارەكردنانە لەلایەن مەلای سەر شەقامەكانەوە دەكرێن و لەوبارەوە دەڵێ " بیستوومە كە لەم ناوچەیەی ئێمە دەكرێ و لەلایەن چەند مەلایەكیشەوە كە هیچ زانیارییەكیان لەسەر ئیسلام نییە و خوێندەوار نین و تەنیا پێشنوێژی دەكەن، زۆر بەخێرایی ئەو پرۆسەیە ئەنجامدەدەن ، بەبێ ئەوەی كەس پێی بزانێت".